NOBYEMBRE 19, 2025 — Nagsampa ng mabibigat na kaso ang Office of the Ombudsman sa Sandiganbayan laban sa ilang opisyal ng Department of Public Works and Highways (DPWH) Region IV-B at mga direktor ng Sunwest Corporation na pinamumunuan ng nagbitiw na kongresista Zaldy Co. Ang reklamo ay kaugnay ng umano’y maling paggamit ng pondong umabot sa ₱289.5 milyon para sa flood control project sa Naujan, Oriental Mindoro.

Ayon kay Assistant Ombudsman Jose Dominic F. Clavano, ang mga akusado ay sinampahan ng kasong malversation of public funds sa pamamagitan ng falsification of public documents sa ilalim ng Revised Penal Code, at paglabag sa Anti-Graft and Corrupt Practices Act (RA 3019). Si Co ay may hiwalay pang kaso dahil sa umano’y pagtanggap ng hindi nararapat na benepisyo.

“Because the amount malversed exceeds P8.8 million, and in line with the law and jurisprudence, the panel of the Ombudsman has recommended no bail for the malversation charge,” ani Clavano. 

(Dahil lumampas sa ₱8.8 milyon ang halagang nawaldas, at alinsunod sa batas at jurisprudence, walang piyansa ang inirekomenda para sa kasong malversation.)

Kasama sa mga kinasuhan sina DPWH Regional Director Gerald A. Pacanan III, Assistant Regional Directors Gene Ryan A. Altea at Ruben C. Santos Jr., Project Engineer III Felisardo S. Casuno, Materials Engineer Timojen A. Sacar, Accountant IV Lerma D. Cayco, Planning and Design Division OIC-Chief Montrexis T. Tamayo, at Maintenance Division Chief Juliet C. Calvo.

Ang reklamo ay unang inirekomenda ng Independent Commission for Infrastructure (ICI), na nagsabing ito ang kauna-unahang kasong naihain sa korte mula nang simulan ang mas malawak na imbestigasyon sa mga proyektong flood control.

“This is the first case that was referred by ICI and, as a result, it is the first case to be filed in court,” dagdag ni Clavano. 

(Ito ang unang kasong inirefer ng ICI at, bilang resulta, ito rin ang unang naisampa sa korte.)

Nag-ugat ang kaso sa inspeksyong isinagawa noong Setyembre 9 nina DPWH Secretary Vince Dizon at Oriental Mindoro Gov. Humerlito Dolor sa road dike sa Mag-Asawang Tubig River. Natuklasan na ang mga steel sheet piles na ginamit ay malayo sa itinakdang pamantayan: imbes na 12 metro, tatlong metro lamang ang sukat.

“During the inspection, they discovered that the steel sheet piles used for the dike were grossly below the required standard,” paliwanag ni Clavano. 

(Sa inspeksiyon, nadiskubre nilang ang mga steel sheet piles na ginamit sa dike ay malayong kulang sa itinakdang pamantayan.)

Dagdag pa niya, posibleng lahat ng materyales na ginamit ay substandard, na nagresulta sa teknikal na falsification, maling paggamit ng pondo, at pagbibigay ng hindi nararapat na benepisyo sa ilang indibidwal.

“We will pursue this case firmly, independently, and without fear or favor,” giit ni Clavano. 

(Itutuloy namin ang kasong ito nang matatag, malaya, at walang kinikilingan.)

Sa kasalukuyan, may iba pang kaso sa preliminary investigation at fact-finding stage, na inaasahang magdadagdag pa sa listahan ng mga opisyal at pribadong indibidwal na haharap sa mabibigat na parusa.

(Larawan: Philippine News Agency)