Nobyembre 20, 2025 — Nasamsam ng mga operatiba ng Philippine National Police Drug Enforcement Group (PNP-DEG) ang ₱68 milyong halaga ng shabu at tatlong baril mula sa tatlong suspek na napatay sa isang buy-bust operation sa Barangay Socorro, Cubao, Quezon City noong Nobyembre 18.

Ayon sa ulat, matagal nang minanmanan ng PDEG ang mga suspek bago isinagawa ang operasyon. “Yung mga suspect po is nasa target list po [sila]... nasa intelligence packet,” pahayag ni Police Lt. Marlon Sy, tagapagsalita ng PDEG.

Naganap ang engkuwentro sa isang gasolinahan kung saan nakipagbarilan ang mga suspek sa mga pulis. Napatay ang tatlong suspek na kinilalang sina alias Jason, 23, isang sinuspindeng security guard; alias Milo, 55; at alias Cal. Isang suspek ang nakatakas habang isang pulis at isang civilian informant ang nasugatan sa insidente.

Ayon sa ulat ng Malaya Business Insight, nakumpiska ng mga awtoridad ang 10 kilo ng shabu na tinatayang nagkakahalaga ng ₱68 milyon. Isinagawa ang operasyon matapos ang ilang buwang surveillance na nagsimula pa noong Agosto.

Patuloy ang pagtugis ng PNP sa nakatakas na suspek at isinasailalim sa masusing imbestigasyon ang mga ebidensiyang nakalap mula sa operasyon. Nagpahayag ang PNP ng pasasalamat sa mga impormante at mga lokal na opisyal na tumulong sa operasyon.

“The operation stemmed from ongoing monitoring since August, as the transaction was progressing,” dagdag ni Lt. Sy sa press briefing sa Camp Crame.