Nobyembre 20, 2025 — Patay ang isang tricycle driver matapos bumangga ang kanyang minamanehong sasakyan sa isang bakal na poste at mahulog sa irrigation canal sa Barangay Bakod Bayan, Cabanatuan City noong Nobyembre 19. 

Ayon sa ulat, sakay ng tricycle ang walong katao, kabilang ang driver, nang mangyari ang aksidente.

Kinilala ng pulisya ang driver bilang isang 48-anyos na residente ng lungsod. Ayon sa imbestigasyon, papunta sana siya sa health center para sa check-up kasama ang kanyang asawa, dalawang anak, at dalawang kapitbahay na may mga anak din. 

Habang bumabaybay sa kalsada malapit sa kanal, nawalan umano ng kontrol ang driver at bumangga sa poste, dahilan upang mahulog ang tricycle sa irrigation canal.

“All eight passengers, including the driver, were thrown off and fell into the canal,” ayon sa ulat ng pulisya. Isinugod sa ospital ang mga nakaligtas, habang idineklara namang dead on arrival ang driver.

Pinaniniwalaan ng mga imbestigador na posibleng inatake ng epilepsy ang driver habang nagmamaneho, dahilan ng pagkawala ng kontrol sa sasakyan. Patuloy ang imbestigasyon ng mga awtoridad upang matukoy ang eksaktong sanhi ng aksidente.

Nagpaabot ng pakikiramay ang lokal na pamahalaan sa pamilya ng nasawi at nanawagan ng mas mahigpit na safety protocols para sa mga pampasaherong tricycle, lalo na sa mga lugar na malapit sa mga mapanganib na daanan tulad ng irrigation canals.