NOBYEMBRE 21, 2025 — Sa Nobyembre 28, libo-libong guro sa pampublikong paaralan ang sabay-sabay na hihinto sa klase upang magsagawa ng tinaguriang “sit-down strike.” Sa halip na tradisyunal na leksyon, gagamitin nila ang oras upang kausapin ang mga estudyante hinggil sa pananagutan, hustisya, at mga ugat ng krisis sa edukasyon.

Ipinahayag ng Alliance of Concerned Teachers (ACT) Philippines na ang kilos-protesta ay hindi lamang sa loob ng silid-aralan. May mga nakaplanong pagkilos sa iba’t ibang rehiyon at kampus, na layong ipakita ang sama-samang pagtutol ng sektor ng edukasyon.

“On November 28, thousands of us will sit — not to rest, but to resist,” ayon kay ACT Chairperson Ruby Bernardo. 

(Sa Nobyembre 28, libo-libong guro ang uupo — hindi para magpahinga, kundi para lumaban.)

Binanggit ni Bernardo na tungkulin ng mga guro na paliwanagan ang kabataan at ipagtanggol ang kinabukasan ng edukasyon at ng bayan.

Dagdag pa niya, “We will hold classroom discussions to expose the rotten system and educate students about accountability, justice, and genuine change.” 

(Magsasagawa kami ng talakayan sa klase upang ilantad ang bulok na sistema at turuan ang mga estudyante hinggil sa pananagutan, hustisya, at tunay na pagbabago.)

Ayon sa ACT, sa kabila ng bilyun-bilyong pondo ng pamahalaan, nananatiling kulang ang silid-aralan, materyales, at pasilidad. 

“While top officials, legislators, and contractors ‘swim in billions,’ schools and communities remain submerged in floods, and teachers and students continue to drown in an ever-worsening education crisis marked by severe shortages,” pahayag ng grupo. 

(Habang ang mga opisyal, mambabatas, at kontraktor ay lumalangoy sa bilyon, ang mga paaralan at komunidad ay patuloy na lumulubog sa baha, at ang mga guro at estudyante ay nalulunod sa lalong lumalalang krisis sa edukasyon na puno ng kakulangan.)

Binatikos ni Bernardo ang administrasyong Marcos-Duterte, na aniya ay “driven by greed for power and public funds” (pinapatakbo ng kasakiman sa kapangyarihan at pondo ng bayan).

Dagdag pa niya, “Both must be held to account and removed, along with all those complicit in systematic and widespread corruption.” 

(Dapat silang panagutin at alisin, kasama ang lahat ng kasangkot sa sistematiko at malawakang korapsyon.)

Nagpahayag ng pakikiisa ang ilang unyon ng mga kawani ng gobyerno at iba pang organisasyon. Para sa kanila, ang laban ng mga guro ay bahagi ng mas malawak na panawagan upang wakasan ang “plunder of public funds” at igiit na ang yaman ng bayan ay ilaan sa serbisyong panlipunan gaya ng edukasyon.

Sa darating na Nobyembre 28, inaasahang magiging makabuluhan ang pagtutol ng mga guro — isang sabayang panawagan na hindi na maaaring ipagsawalang-bahala.

(Larawan: Philippine News Agency)