NOBYEMBRE 21, 2025 — Nagbabala ang Land Transportation Franchising and Regulatory Board (LTFRB) laban sa mga drayber at operator ng pampublikong sasakyan na tumatanggi sa 20-porsyentong diskuwento para sa mga estudyante tuwing weekend, holiday, o kahit may suspensyon ng klase. Ayon sa ahensya, malinaw na paglabag ito sa batas at maaaring magresulta sa mabigat na parusa.

Sa pahayag ni LTFRB Chairperson Vigor Mendoza II, binigyang-diin niyang may mga reklamo na natanggap ang tanggapan hinggil sa hindi pagbibigay ng diskuwento sa mga pasahero. 

“The law is very clear about this. There must be a discount to students even during holidays for as long as they are enrolled,” aniya. 

(Napakalinaw ng batas tungkol dito. Dapat may diskuwento sa mga estudyante kahit holiday basta’t sila ay naka-enroll.)

Ang Republic Act 11314, o “An Act Institutionalizing the Grant of Student Fare Discount Privileges on Public Transportation,” ay nagsasaad na ang benepisyo ay dapat ipatupad sa buong panahon ng enrollment ng estudyante, kabilang ang Sabado, Linggo, at mga regular na holiday.

Hindi lamang mga estudyante ang sakop ng patakaran. Kasama rin dito ang senior citizens at persons with disabilities (PWDs) na may parehong karapatan sa diskuwento.

Mahigpit ang kaparusahan sa mga lalabag:

• Para sa drayber ng PUV, tatlong buwang suspensyon ng lisensya at multang ₱1,000 kada paglabag.
• Para sa operator, multang hanggang ₱15,000 at posibleng pagbawi ng Certificate of Public Convenience (CPC).

Nagbabala pa si Mendoza, “Kaya umayos kayo dahil kung hindi, ako mismo ang aayos ng mga kaso laban sa inyo para hindi lang kayo magmulta kung hindi mawalan kayo ng prangkisa.” 

Hinimok din ng LTFRB ang mga estudyante na magsumite ng reklamo laban sa mga hindi sumusunod sa pamamagitan ng hotline 0956-761-0739 o sa opisyal na social media accounts ng ahensya. 

“All you have to do is to properly document it, and we will take care of the rest,” dagdag ni Mendoza. 

(Ang kailangan lang ay maayos na madokumento ang reklamo, at kami na ang bahala sa susunod na proseso.)

Sa utos ng Pangulong Ferdinand Marcos Jr., iginiit ng LTFRB na hindi dapat mapagkaitan ng karapatan ang mga estudyante at iba pang sektor na may diskuwento sa pamasahe — anumang araw ng linggo.

(Larawan: Philippine News Agency)