Nobyembre 21, 2025 - Inihayag ni Ombudsman Jesus Crispin “Boying” Remulla na inaasahang magsasampa ng kaso ang kanyang tanggapan laban kay dating House Speaker at Leyte 1st District Representative Martin Romualdez kaugnay ng mga iregularidad sa mga proyekto ng flood control sa loob ng anim hanggang siyam na buwan.

Ginawa ni Remulla ang pahayag sa isang forum na inorganisa ng University of the Philippines College of Law sa Bonifacio Global City noong Nobyembre 20. Nang tanungin ni ekonomistang si Prof. Winnie Monsod kung may kasong ihahain laban kay Romualdez sa nasabing panahon, diretsong tugon ni Remulla: “Oh yes, yes ma’am. Yes ma’am.” Dagdag pa niya, “I will never file a lousy case. I’m not that kind of person. I want things to be done properly. I want it to be documented. I want it to be solid.”

Ayon kay Remulla, halos 40 araw nang isinasagawa ang review ng mga ebidensyang may kaugnayan sa kontrobersiya. Bagamat tumanggi siyang magbigay ng detalye, sinabi niyang tinitingnan ng kanyang opisina ang mga posibleng paglabag sa batas na maaaring patunayan sa korte. 

Ibinunyag din niya na nakipag-ugnayan si Romualdez sa kanya upang ipaliwanag na wala siyang kinalaman sa mga anomalya. “He was trying to make a case, his case, that had nothing to do with anything. We just listened… We just follow the evidence,” ani Remulla.

Ang isyu ay bahagi ng mas malawak na imbestigasyon sa umano’y multi-bilyong pisong flood control fund anomalies, kung saan sangkot din si dating Ako Bicol Representative Zaldy Co. Nauna nang sinabi ni Pangulong Ferdinand Marcos Jr. na isusumite ng Independent Commission for Infrastructure (ICI) at Department of Public Works and Highways (DPWH) sa Office of the Ombudsman ang lahat ng ebidensyang nakalap laban kina Romualdez at Co para sa mas malalim na imbestigasyon.

Patuloy ang pagbusisi ng Ombudsman sa mga proyektong pinondohan ng pambansang badyet, partikular ang mga hindi natapos o hindi tumutugma sa teknikal na pamantayan. Inaasahan ng publiko na magbunga ang imbestigasyon ng pananagutan sa mga opisyal na sangkot sa mga iregularidad.