CEBU, Philippines — Nanatiling normal ang operasyon ng mga bus terminal na pinamamahalaan ng Pamahalaang Panlalawigan ng Cebu sa kabila ng epekto ng Tropical Depression “Verbena,” maliban lamang sa mga inter-island routes na pansamantalang kanselado.

Ayon kay Ahmed Cuizon, Bus Terminal Administrator ng Cebu Province, tuloy-tuloy ang biyahe ng mga bus papunta at mula Cebu-South ngayong gabi. Sa Cebu South Bus Terminal (CSBT), bukas ang biyahe ng Bato-Oslob at Bato-Barili hanggang 11:00 PM, na siyang karaniwang huling trip sa mga rutang patungong timog.

Magbubukas din muli ang operasyon ng terminal simula 1:00 AM bukas, Nobyembre 25, 2025, bilang bahagi ng regular na schedule. Iniulat rin na lahat ng kalsada papunta at mula sa southern destinations ay passable o madaanan sa kasalukuyan.

Gayunpaman, kanselado muna ang mga inter-island trips kabilang ang biyahe papunta at mula Siquijor, Zamboanga at Dumaguete, bilang pag-iingat sa banta ng masamang panahon.

Normal din ang operasyon ng mga bus papuntang Cebu-North, maliban sa mga rutang nangangailangan ng paglalayag palabas ng Cebu.

Pinayuhan ang mga pasaherong apektado ng kanselasyon na bumalik muna sa kanilang tahanan o pinanggalingan at maghintay ng karagdagang abiso mula sa mga awtoridad at terminal management.

Patuloy namang nakikipag-ugnayan ang pamahalaang panlalawigan sa mga transport operators upang matiyak ang kaligtasan ng mga biyahero sa gitna ng sama ng panahon. (Larawan: Cebu Province / Facebook)