NAGA CITY — Dalawang magkapatid na babae ang natagpuang patay sa magkaibang lugar sa Naga City, Camarines Sur nitong Linggo, Disyembre 7, at tinitingnan ng mga awtoridad na crime of passion ang motibo sa krimen.

Ayon sa ulat ng Philippine News Agency (PNA), kinilala ang mga biktima na sina Claudine, 27, at Mae, 25. Natagpuan si Claudine sa Barangay Concepcion Grande, nakahandusay sa gilid ng kalsada na may matinding pinsala kabilang ang pagkakaputol ng kanang braso at mga saksak sa leeg at kaliwang braso. Samantala, natagpuan naman si Mae sa Barangay Concepcion Pequeña, nakabalot sa kumot at tinalian ng electrical wire, na may mga saksak sa dibdib.

Ayon kay Police Regional Office in Bicol (PRO-5) Regional Director Brig. Gen. Erosito Miranda, “We will pursue every lead and mobilize available resources to apprehend the suspect to both killings.” Inatasan niya ang Naga City Police Office na magsagawa ng malawakang manhunt laban sa pangunahing suspek.

Batay sa imbestigasyon, posibleng may kinalaman ang personal na relasyon ng isa sa mga biktima sa suspek, dahilan upang ikonsidera ng mga pulis na crime of passion ang motibo. Patuloy ang pagtutok ng mga imbestigador sa mga nakalap na ebidensya at testimonya ng mga residente sa lugar.

Nagpahayag ng pagkabahala ang lokal na pamahalaan at tiniyak na makikipagtulungan sa pulisya upang agad na mahuli ang salarin. Nanawagan din ang mga awtoridad sa publiko na magbigay ng impormasyon na makatutulong sa ikalulutas ng kaso.

Ang karumal-dumal na krimen ay nagdulot ng pangamba sa mga residente ng Naga City, na umaasang agad na mahuhuli ang suspek upang matigil ang takot at mabigyan ng hustisya ang magkapatid na biktima.

Larawan mula Facebook