MANILA, Philippines — Kinasuhan ng Department of Justice (DOJ) ang negosyanteng si Atong Ang kasama ang 25 iba pang indibidwal sa 10 bilang ng kidnapping with homicide at 16 bilang ng kidnapping with serious illegal detention, kaugnay ng kontrobersiyal na kaso ng mga nawawalang sabungeros.

Ayon sa DOJ Panel of Prosecutors, nakakita sila ng prima facie evidence na nagtatatag ng “reasonable certainty of conviction,” na siyang naging batayan sa pagsasampa ng mga kaso laban sa mga respondente. Ibig sabihin, may sapat na ebidensya upang ituloy sa hukuman ang paglilitis sa kaso at panagutin ang mga sangkot.

Ang tinaguriang “missing sabungeros” case ay isa sa mga pinaka-mabigat na kasong kriminal na umani ng pansin sa buong bansa sa mga nagdaang taon, dahil sa misteryosong pagkawala ng ilang indibidwal na umano’y may kaugnayan sa ilegal na sabong.

Sa ngayon, wala pang opisyal na pahayag mula sa kampo ni Ang hinggil sa mga isinampang kaso. Samantala, nilinaw ng DOJ na patuloy pa rin ang masusing imbestigasyon at haharap sa korte ang mga nasasangkot upang harapin ang kani-kanilang pananagutan sa ilalim ng batas. Tiniyak ng kagawaran na ipagpapatuloy nila ang pagtugis ng hustisya para sa mga biktima at kanilang mga pamilya, habang sinusubukang resolbahin ang isa sa mga pinakamalalaking kasong kriminal sa bansa. (Larawan: PEP / Google)