MANILA — Inutusan ng National Police Commission (NAPOLCOM) ang pagpapatalsik sa pitong pulis ng Caloocan City kaugnay ng pagkamatay ng isang binatilyo na nagkasakit ng leptospirosis matapos lumusong sa baha upang hanapin ang kanyang ama na ilegal na ikinulong ng mga pulis.

Sa isang press conference, sinabi ni NAPOLCOM Vice Chairperson at Executive Officer Atty. Ralph Calinisan na “We decided all those involved in this Caloocan incident will be dismissed from the service.” Dagdag pa niya, nagkaisa ang komisyon sa desisyon matapos ang deliberasyon noong nakaraang linggo.

Kinilala ang mga sinibak na pulis na sina Capt. Romel Caburog, Lt. Jeffren Aganos, Master Sgt. Ryan Candelario, Staff Sgts. Stephen Somlani, Darwin Indiongco, Rodolfo King Bautista, at Cpl. Marvin Resumadero.

Ayon sa ulat ng Philippine News Agency, nagsimula ang kaso nang iligal na arestuhin at ikulong ng mga pulis si Jayson dela Rosa noong Setyembre. Dahil dito, napilitang lumusong sa baha ang kanyang anak upang hanapin siya, ngunit nagkasakit ng leptospirosis at kalaunan ay namatay. Ang insidente ay nagdulot ng matinding galit mula sa publiko at simbahan, at naging dahilan upang magsampa ng kasong administratibo laban sa mga sangkot na pulis.

Noong Setyembre, naghain ang NAPOLCOM ng mga kasong grave misconduct, grave dishonesty, oppression, incompetence, at conduct unbecoming of a police officer laban sa pitong pulis. Sa kanilang imbestigasyon, napatunayang lumabag ang mga ito sa kanilang tungkulin at nagdulot ng pagkamatay ng inosenteng biktima.

Mariing kinondena ni Caloocan Bishop Pablo Virgilio David ang insidente at nanawagan ng hustisya para sa pamilya ng biktima. Ayon sa kanya, ang nangyari ay patunay ng pang-aabuso ng kapangyarihan ng ilang miyembro ng pulisya.

Tiniyak ni Calinisan na ang desisyon ng NAPOLCOM ay magsisilbing babala sa lahat ng pulis na hindi kukunsintihin ang anumang uri ng pang-aabuso. “This is a clear message that the commission will not tolerate grave misconduct and abuse of authority,” aniya.

Sa kasalukuyan, nakatakdang iproseso ng Philippine National Police (PNP) ang implementasyon ng dismissal order laban sa pitong pulis.