MOUNTAIN PROVINCE — Nananawagan ng hustisya ang mga residente at animal welfare groups para kay Axel, isang American Bully dog na binugbog hanggang sa mamatay ng isang lalaki sa Barangay Saclit, Sadanga, Mountain Province.

Makikita sa viral na video ang suspek na paulit-ulit na hinampas si Axel gamit ang isang kahoy na pamalo sa harap ng ilang tao. Sinubukan pang tumakas ng aso ngunit hinabol at muling pinagsasaktan hanggang sa tuluyang mamatay. Sa paliwanag ng suspek, ginawa niya ito matapos umanong umihi ang aso sa kanya.

Mariing kinondena ni Sadanga Mayor Robert Wanawan ang insidente. “We have a belief that when a dog peed on you, it could be a sign of bad luck or death. It could be out of anger that the man killed the dog,” aniya, ngunit binigyang-diin na hindi ito makatarungang dahilan upang pumatay ng hayop.

Kinumpirma ng lokal na pamahalaan na ang suspek ay driver ng isang municipal employee, matapos lumabas ang espekulasyon na isa itong konsehal. Ayon sa Inquirer.net, naghahanda na ang LGU na magsampa ng kasong kaugnay sa animal cruelty laban sa kanya.

Samantala, nanawagan ang Animal Kingdom Foundation (AKF) ng agarang aksyon mula sa lokal na pamahalaan. Sa kanilang pahayag, iginiit nilang dapat managot ang suspek sa ilalim ng Republic Act 8485 o Animal Welfare Act, na nagbabawal sa anumang uri ng pagmamalupit sa hayop. “We call on authorities to ensure that justice is served for Axel and to prevent similar acts of cruelty in the future,” ayon sa AKF.

Sa video na kumalat online, makikita rin ang mga bystander na hindi agad kumilos upang pigilan ang pananakit, bagay na lalong ikinagalit ng publiko. Maraming netizens ang nagpahayag ng pagkadismaya at nanawagan ng mas mahigpit na pagpapatupad ng batas laban sa animal cruelty.

Ayon sa mga awtoridad, nakatakdang ihain ang reklamo laban sa suspek sa mga darating na araw. Tiniyak ng LGU na sisiguraduhin nilang makakamit ang hustisya para kay Axel at magsisilbing babala ang insidente laban sa karahasan sa mga hayop.

Larawan mula MBY Pet Rescue and Sanctuary