Apat na malalaking kumpanya ng Japan ang maglalagak ng P23.5 bilyon sa ekonomiya ng Pilipinas, na nagpapakita ng malakas na tiwala sa potensyal ng bansa para lumago. Ang mga pangakong puhunan ay nakuha sa isang high-level na pagbisita sa Japan ni Frederick Go, Espesyal na Assistant sa Pangulo para sa Pamumuhunan at Ekonomiya, at ni Kalihim ng Kalakalan na si Cristina Roque noong Marso 3 at 4.

Saklaw ng mga talakayan ang iba’t ibang sektor, kabilang ang renewable energy, pagmamanupaktura, fashion, at teknolohiya. Binigyang-diin ni Roque ang tumataas na interes ng mga Japanese companies. “Many expressed interest in expanding their existing operations or establishing new ventures in our country.” 

(Marami ang nagpakita ng interes na palawakin ang kanilang operasyon o magtayo ng mga bagong negosyo sa ating bansa.)

Ito ay dahil sa mga reporma tulad ng CREATE MORE Law, na nagpapadali sa mga insentibo sa buwis at proseso ng pamumuhunan.

Kabilang sa mga pangunahing kumpanya, ang Nidec Corp. ay nagpaplano palawakin ang operasyon nito sa pagmamanupaktura, partikular sa produksyon ng gearbox at posibleng pumasok sa larangan ng humanoid robotics. Ang Ibiden Co. Ltd., isang lider sa semiconductor components, ay naghahanap ng oportunidad para mas lumaki ang presensya nito sa Pilipinas. 

Samantala, ang Sumitomo Corp. ay nag-iisip ng mas malaking puhunan sa renewable energy, naaayon sa adhikain ng gobyerno para sa energy security at sustainability.

Naging sentro rin ng usapan ang fashion industry. Ang Fast Retailing Co. Ltd., ang kumpanyang may-ari ng Uniqlo, ay inanyayahan na mag-explore ng manufacturing partnerships sa Pilipinas. Binigyang-diin ni Roque ang muling pagbangon ng industriya ng tela at disenyo sa bansa, na nagsabi, “We are currently revitalizing our textile and fashion design industry and would be very interested in exploring the possibility of being a candidate for your partner factory model program.” 

(Kasalukuyan naming binibigyang-buhay muli ang ating industriya ng tela at fashion design, at interesado kaming maging kandidato sa inyong partner factory model program.)

Bukod dito, ang Adastria Co. Ltd., isang Japanese apparel retailer na may 45 brands, ay nagpaplano palawakin ang presensya nito sa Pilipinas sa pamamagitan ng pagpapakilala ng mga bagong label tulad ng Global Work at Lowry’s Farm. Hinikayat din ang kumpanya na mag-explore ng lokal na sourcing at manufacturing opportunities.

Nagbukas din ng oportunidad para sa mga Philippine-made lifestyle products, dahil nagpakita ng interes ang Etoile Kaito & Co. Inc. na i-export ang mga lokal na produktong gawa sa katutubong materyales tulad ng capiz shells at abaca.

Ang malaking puhunan ng Japan ay patunay na ang Pilipinas ay isang kaakit-akit na hub para sa inobasyon, pagmamanupaktura, at sustainable development. Para sa mga negosyante, ito ay malinaw na senyales na puno ng oportunidad ang bansa para sa kolaborasyon at paglago.

(Larawan: GMA Network)