MAYO 5, 2025 — Inilunsad na ng pamahalaan ng Pilipinas noong Lunes ang isang 10-taon na estratehiya para bigyan ng kakayahan ang mga manggagawa sa mabilisang pagbabago ng teknolohiya, kabilang ang automation at digitalization.

Tinawag itong Trabaho Para sa Bayan (TPB) Plan, at layunin nitong baguhin ang labor market habang tinutugunan ang mga kakulangan sa trabaho mula 2025 hanggang 2034.

Pinangunahan ito ng Department of Economy, Planning, and Development (DEPDev). Ito ang kauna-unahang komprehensibong roadmap ng bansa para palakasin ang paglikha ng trabaho at ang katatagan ng workforce.

Batay ito sa Republic Act No. 11962, ang Trabaho Para sa Bayan Act, na naipasa noong 2023 para harapin ang mga hamon sa employment.

Kabilang sa mga pangunahing focus nito ang pagpapahusay ng kakayahan ng mga manggagawa para sa tech-driven industries, pagsuporta sa micro at small enterprises, at pagtugon sa hindi pantay na oportunidad sa trabaho sa iba’t ibang rehiyon.

Binibigyang-diin din ng plano ang inclusive growth, lalo na sa mga sektor na delikado sa economic disruptions.

Hindi inilahad ang tiyak na budget. Sa ngayon, kaabang-abang kung paano magiging epektibo ang plano mula sa papel hanggang sa tunay na buhay.

(Larawan: Presidential Communications Office)