HUNYO 2, 2025 — Nagpatupad ang Securities and Exchange Commission (SEC) ng malawakang pagbawi ng lisensya sa 56 lending at financing companies dahil sa paulit-ulit na paglabag sa mga regulasyon. Lalong pinaigting ng ahensya ang kampanya nito laban sa mga kompanyang pabaya sa pagsunod sa batas.

Ibinasura ng Financing and Lending Companies Department (FinLenD) ang certificates of authority at primary registrations ng mga kompanya matapos ang maraming paglabag. Nabigo ang 47 na kompanya na isumite ang mga required reports — kasama ang audited financial statements, general information sheets, at compensation details — nang tatlong beses sa loob ng limang taon.

Hindi sineryoso ng mga kompanya ang mga show-cause notices mula sa SEC, kaya nagdesisyon ang ahensya na magsagawa ng malawakang aksyon. Ayon sa Revised Corporation Code (Republic Act No. 11232), may kapangyarihan ang komisyon na parusahan ang mga korporasyon sa ganitong mga paglabag.

Nabigo naman ang pitong kompanya na magsumite ng business plans ayon sa SEC Memorandum Circular No. 3 (2022), habang dalawa ang hindi nagbigay ng official contact details para sa mga transaksyon.

Kasunod ito ng pagkansela sa permits ng Digido Finance Corp., kung saan naalis din ang operating rights ng mga online lending platforms nito — ang UnaPay, UnaCash, at Digido Philippines Online Loan.

Binigyang-diin ng SEC na ang hakbang na ito ay para protektahan ang mga investor mula sa potensyal na panloloko, lalo na ng mga ilegal na nag-ooperate na lending firms. Patuloy na minomonitor ng ahensya ang sektor at nagbabala ng mas mahigpit na pagpapatupad ng batas sa hinaharap.

(Larawan: Securities and Exchange Commission Philippines | Facebook)