HUNYO 13, 2025 — Nagpapatupad ng mas mahigpit na seguridad ang Bangko Sentral ng Pilipinas (BSP) para sa digital banking, kung saan hinihimok ang mga financial institution na gumamit ng mas advanced na authentication methods kasama ng one-time passwords (OTPs) para labanan ang dumaraming cybercrime. Bagama't malawak pa rin ang paggamit ng OTP, binibigyang-diin ng regulators ang vulnerability nito sa interception, kaya isinusulong ang mas modernong safeguards tulad ng biometrics at hardware tokens.

Inamin ni Deputy Governor Elmore Capule ang magiging dagdag na gastos para sa mga bangko, pero binigyang-diin niya ang urgency ng pag-upgrade ng seguridad.

"We have to realize that all of these things are very, very expensive. That’s the reality. So, we are giving them sufficient time," aniya. "But, at the same time, we realize that if they will not adapt to this, then we cannot really solve these scamming, these frauds."

(Kailangan nating tanggapin na napakamahal ng mga bagay na ito. 'Yan ang realidad. Kaya binibigyan natin sila ng sapat na panahon. Pero, kung hindi sila maga-adapt, hindi talaga natin maso-solusyunan ang mga scam at fraud na ito.)

Nakasaad sa BSP Circular No. 1213 ang direktiba laban sa mga authentication tools na madaling ma-intercept, lalo’t tumataas ang social engineering attacks kung saan dinadaya ng mga scammer ang users para makuha ang login details. Kailangan nang maglagay ang mga bangko ng multi-layered verification, kasama na ang behavioral biometrics at cryptographic keys, lalo na sa high-risk transactions.

Sumasabay ito sa global trend — inaalis na ng mga bangko sa Singapore ang OTPs noong nakaraang taon dahil sa sophisticated phishing schemes. Suportado rin ng BSP ang Anti-Financial Account Scamming Act, na nangangailangan ng mas mahigpit na fraud prevention measures.

Bagama’t posibleng tuluyan nang alisin ang OTP sa hinaharap, unti-unti muna ang transition para balansehin ang seguridad at operational costs. Sa ngayon, malinaw ang mensahe ng BSP: hindi na sapat ang umasa lamang sa OTP.

(Larawan: Pexels)