Maynila, Pilipinas- Ipinasa ng Kongreso ng Estados Unidos ang 'Take It Down Act', isang bipartisan na batas na naglalayong labanan ang pagkalat ng mga non-consensual intimate images (NCII), kabilang ang mga AI-generated deepfakes at tinatawag na 'revenge porn'. Ang panukalang batas ay inaprubahan ng House of Representatives sa botong 409-2 noong Abril 28, 2025, matapos itong maipasa ng Senado nang walang pagtutol noong Pebrero. Inaasahang lalagdaan ito ni Pangulong Donald Trump upang maging ganap na batas.

Ang batas ay nagbabawal sa sinumang sadyang mag-post o magbanta na mag-post ng mga NCII nang walang pahintulot ng taong nasa larawan o video. Inaatasan din nito ang mga social media platforms at website na alisin ang nasabing content sa loob ng 48 oras mula sa oras ng abiso ng biktima, at tanggalin ang mga duplicate nito. Ang mga lalabag ay maaaring makulong ng hanggang dalawang taon, o tatlong taon kung menor de edad ang biktima.

Ang 'Take It Down Act' ay isinulong nina Senador Ted Cruz (Republican Senador ng Texas) at Amy Klobuchar (Democrat na Senador ng Minnesota), at malakas na sinuportahan ni First Lady Melania Trump bilang bahagi ng kanyang 'Be Best' campaign. Ang panukalang batas ay nag-ugat sa mga kaso ng mga kabataang biktima ng deepfake, tulad ni Elliston Berry, isang estudyante mula sa Texas na ginamitan ng AI upang lumikha ng pekeng hubad na larawan mula sa kanyang Instagram post.

Bagama't malawak ang suporta para sa batas mula sa mga tech companies tulad ng Meta, Google, at Snap, at mga advocacy groups, may mga kritiko rin mula sa mga digital rights organizations tulad ng Electronic Frontier Foundation at Cyber Civil Rights Initiative. Ipinahayag nila ang pag-aalala na maaaring gamitin ang batas sa maling paraan upang supilin ang lehitimong nilalaman at mapanganib ang kalayaan sa pagpapahayag.