TOKYO — Sa kauna-unahang pagkakataon, pinayagan ng Japan ang pagbebenta ng emergency contraceptive pill o “morning-after pill” nang walang reseta, ayon sa pahayag ng ASKA Pharmaceutical noong Oktubre 20. Ang gamot na Norlevo ay maaari nang bilhin sa mga botika bilang “medicine requiring guidance,” ibig sabihin ay kailangang inumin ito sa presensya ng isang pharmacist.

Ayon sa kumpanya, “ASKA Pharmaceutical has obtained the marketing authorisation as a switch to OTC [over-the-counter] use of the emergency contraceptive pill commercialised under the trademark Norlevo”. Walang age restriction o requirement para sa parental consent sa pagbili ng gamot.

Ang desisyong ito ay itinuturing na makasaysayan sa isang bansang may konserbatibong pananaw sa reproductive health. Sa mahigit 90 bansa, matagal nang available ang morning-after pill nang walang reseta, ngunit sa Japan, kinakailangan pa noon ng konsultasyon sa doktor, bagay na naging hadlang lalo na sa mga kabataang babae at biktima ng pang-aabuso.

Ang pill ay gumagana sa pamamagitan ng pagpigil sa pagbuo ng itlog ng babae o sa pagdikit nito sa matres. Epektibo ito kung iinumin sa loob ng tatlo hanggang limang araw matapos ang hindi protektadong pakikipagtalik, ngunit mas mainam kung mas maaga itong inumin.

Ayon sa mga women's rights groups, ang hakbang na ito ay isang tagumpay sa kampanya para sa mas malawak na access sa reproductive health services sa Japan. Bagama’t wala pang tiyak na petsa kung kailan ito magiging available sa merkado, inaasahang magsisimula ang bentahan bago matapos ang fiscal year.

Larawan mula Japan Times