ROSARIO, BATANGAS — Habang karamihan sa mga bata ay abala sa paglalaro o paghawak ng gadgets, si Kirk Usain Belen, 12 taong gulang, ay nakatagpo ng tunay na kasiyahan sa pagsasaka at pag-aalaga ng hayop. Kilala ngayon online bilang “Idol Little Farmer”, si Kirk ay nagsisilbing inspirasyon hindi lamang sa kapwa bata kundi maging sa mas nakatatanda, na ang pagsasaka ay hindi lamang marumi o nakakapagod, kundi isang makabuluhang gawain.

Ayon kay Kirk, nagsimula ang kanyang hilig sa pagsasaka noong siya’y tatlong taong gulang pa lamang. Ang kanyang tiyuhin na si Dado, isang magsasaka rin, ang unang nagmulat at nagturo sa kanya. “Minsan nga umiyak pa ako kasi hindi ako pinayagang magpaligo ng baboy. Binilhan ako ni Tito ng hose para makapagbuhos ng tubig,” pagbabalik-tanaw ni Kirk.

Dahil sa walang sawang interes ng bata, nagpasya ang kanyang mga magulang na magpatayo ng maliit na farm. “Nag-aalala kami noon kasi lagi siyang nasa ibang bukirin para lang makatulong. Kaya naisip namin na magtayo ng sarili naming farm para suportahan siya,” ani Javier Belen, ama ni Kirk at isang bumbero.

Mula sa sampung baboy, lumago na ngayon ang kanilang alagang hayop—goat, manok, pabo, bibe, at mahigit 600 broiler chicks. Marami rin sa mga alagang hayop ang kanilang naibebenta upang magkaroon ng dagdag na kita para sa pamilya.

Bukod sa pagiging masipag na estudyante sa Grade 7, maayos na nababalanse ni Kirk ang oras para sa pag-aaral at pagtulong sa farm. Marunong na rin siyang magbigay ng vitamins at bakuna sa hayop, tumulong sa panganganak ng inahin, at maglinis ng kulungan.

Sa tulong ng social media, naipapakita ni Kirk ang kanyang buhay-magsasaka sa kanyang higit 20,000 followers sa Facebook at TikTok. Isa sa kanyang mga viral video ay ang pagtulong niya sa isang mahirap na panganganak ng baboy, na umani ng milyun-milyong views.

Para kay Kirk, ang pagsasaka ay hindi gawain kundi isang buhay na may layunin. “Masaya ako kapag nakikita kong lumalakas at lumulusog ang mga hayop. Gusto ko ring ipakita sa ibang bata na ang pagsasaka ay masaya at nakapagbibigay ng disiplina,” aniya.

Pinapangarap ni Kirk na balang araw ay maging doktor ng hayop at palawakin pa ang kanilang farm. Naniniwala siya na sa murang edad pa lang, mahalagang matutunan ng mga kabataan ang halaga ng pagsasaka at pagpapahalaga sa mga taong nagsisikap upang may pagkain sa ating hapag-kainan. (Larawan: Kirk Belen / Agriculture Magazine)