MANILA — Kinumpirma nina Jisoo ng BLACKPINK at Zayn Malik, dating miyembro ng One Direction, ang kanilang unang musical collaboration para sa digital single na pinamagatang “Eyes Closed”, na nakatakdang ilabas sa Oktubre 10, 2025.

Sa magkahiwalay na social media posts, ibinahagi ng dalawang global artists ang opisyal na poster ng kanta, kung saan makikita si Jisoo sa foreground at si Zayn sa likuran, may maaninag na tattoo sa kanyang ulo — isang palatandaan na agad kinilala ng fans. Sa caption ni Jisoo: “Two voices, one orbit. Coming soon.”

Ang “Eyes Closed” ay isang romantic ballad na tampok ang emosyonal na blending ng boses nina Jisoo at Zayn. Sa teaser na inilabas sa Instagram Stories, maririnig ang bahagi ng lyrics:
“We should fall in love with our eyes closed, better if we keep it where we don’t know. The nights we’ve been in, the names and the faces of who we were with.”

Ayon sa ulat ng ABS-CBN News, ito ang unang international collaboration ni Jisoo bilang solo artist, kasunod ng kanyang EP na “Amortage” noong Pebrero. Para naman kay Zayn, ito ang unang venture sa K-pop industry, kasabay ng kanyang paghahanda para sa Las Vegas residency sa Enero 2026 at isang Netflix docu-travel series kasama si Louis Tomlinson.

“I’ve got some new music coming out soon with another cool collaborator. That is coming out first,” ani Zayn sa isang livestream, bago pa man kumpirmahin ang proyekto. Dagdag pa niya, ang kanyang bagong album ay may South Asian influences, at posibleng may mga awiting nasa wikang Urdu.

Matatandaang dumalo si Zayn sa BLACKPINK concert sa New York noong Hulyo, kasama ang anak niyang si Khai. Sa kanyang Instagram post, sinabi niya: “@BLACKPINKOFFICIAL THANK YOU ???? ME & KHAI LOVED IT.”

Samantala, si Jisoo ay kasalukuyang nasa kalagitnaan ng “Deadline” World Tour ng BLACKPINK, na inaasahang titigil sa Pilipinas ngayong Nobyembre. Noong Marso, nagdaos siya ng solo fan meet sa bansa bilang bahagi ng “Lights, Love, Action!” tour.

Ang “Eyes Closed” ay inaasahang magiging isa sa pinaka-inaabangang pop collaborations ngayong taon, na pinagsasama ang K-pop at Britpop sa isang makabagbag-damdaming awitin.

Larawan mula sa Jisoo, Zayn/Instagram