MANILA, Philippines — Nagbabala ang mga eksperto sa kalusugan na maaaring maapektuhan ang maayos na tulog ng isang tao dahil sa sunod-sunod na aktibidad ngayong holiday season. Sa ulat ng PhilSTAR L!fe, ipinaliwanag ng neurologist at sleep specialist na si Dr. Deborah Bernardo na ang mga pagdiriwang tulad ng Christmas parties, reunion, at biyahe, pati na rin ang stress sa paghahanda para sa mga ito, ay maaaring magdulot ng pagkagambala sa regular na sleep schedule.

Ayon kay Dr. Bernardo, ang mga aktibidad na umaabot hanggang gabi ay maaaring magpahirap sa katawan na makatulog sa karaniwang oras. Dahil dito, nagkakaroon ng kakulangan sa tulog na maaaring magresulta sa pagkapagod, iritabilidad, at paghina ng resistensya ng katawan—isang bagay na hindi kanais-nais lalo na sa gitna ng kapaskuhan.

Samantala, binigyang-diin din ng neurologist na si Dr. Pearl Angeli Diamante na ang pagkain ng mabibigat na ulam tuwing hapunan o dalawa hanggang tatlong oras bago matulog ay maaaring magdulot ng discomfort at hirap sa pagtulog. Ayon sa kanya, mas aktibo ang digestion kapag busog, kaya nahihirapan ang katawan na mag-relax at pumasok sa mahimbing na tulog.

Upang masiguro ang sapat at dekalidad na pahinga ngayong holiday season, nagbigay ng ilang praktikal na payo ang mga neurologist. Kabilang dito ang pag-iwas sa heavy meals at labis na pag-inom ng alak at kape bago matulog, paggawa ng komportableng sleeping area sa pamamagitan ng pagpatay ng ilaw at pag-set ng tamang temperatura ng kwarto, at pag-iwas sa paggamit ng gadgets kapag malapit na ang oras ng pagtulog. Mahalaga rin umanong gumising pa rin sa karaniwang oras upang mapanatili ang regular na body clock. Paalala ng mga eksperto, ang sapat na tulog ay mahalagang bahagi ng pangkalahatang kalusugan. Sa gitna ng kasiyahan ng kapaskuhan, hindi dapat isantabi ang pahinga upang mas ma-enjoy ang selebrasyon nang malusog at masigla. (Larawan: Keck Medicine of USC )