MAYNILA, Pilipinas — Marso 20, 2025 — Naglabas ng bagong mga panuntunan ang Department of Agriculture (DA) para sa maximum suggested retail price (SRP) ng pangunahing bilihin tulad ng bigas at baboy, kasabay ng ulat ng Philippine Statistics Authority (PSA) tungkol sa pagtaas ng presyo ng karne at isda ngayong Marso.

Ayon sa monitoring ng PSA mula Marso 1-5, tumaas ang presyo ng sariwang liempo sa ₱384.08 kada kilo, mula ₱378.84 kada kilo noong kalagitnaan ng Pebrero at ₱375.02 kada kilo noong isang buwan.

umaas din ang presyo ng galunggong sa ₱235.26 kada kilo, kumpara sa ₱231.24 noong katapusan ng Pebrero at ₱226.43 noong unang bahagi ng Pebrero.

Bilang tugon sa pagtaas ng presyo ng baboy, ipinatupad ng gobyerno ang SRP na ₱380 kada kilo para sa liempo at ₱350 para sa kasim at pigue simula Marso 10. Nagpatupad din ang DA ng SRP na ₱300 kada kilo para sa baboy na ibinebenta ng mga trader sa retailers.

Gayunpaman, ayon sa DA, mababa pa rin ang pagsunod ng mga negosyante sa itinakdang presyo. "The persistent high prices are primarily due to the steep wholesale prices charged by traders," ayon sa pahayag ng ahensya.

Samantala, ang SRP ng imported na bigas, na unang itinakda sa ₱58 kada kilo noong Enero, ay ibinaba sa ₱49 kada kilo simula Marso 1. Ipinaliwanag ni Agriculture Secretary Francisco P. Tiu Laurel Jr. na ang pagbaba ng presyo ay dulot ng bumababang presyo ng bigas sa pandaigdigang merkado, mas matibay na piso, at pagbaba ng taripa.

"If the trend continues, the MSRP for imported rice might drop further to around ₱45 per kilo by March 31," aniya.

Ayon pa sa PSA, bumaba rin ang presyo ng regular-milled rice sa ₱46.30 kada kilo noong unang bahagi ng Marso, mula ₱47.19 noong katapusan ng Pebrero at ₱47.77 noong isang buwan.

Tiniyak naman ng DA sa mga lokal na magsasaka na hindi maaapektuhan ng pagbaba ng taripa ang pondo para sa Rice Competitiveness Enhancement Fund (RCEF), na protektado sa ilalim ng binagong Rice Tariffication Law.

Patuloy na binabantayan ng DA ang mga galaw sa pamilihan at muling tiniyak ang dedikasyon nito sa pagsigurong abot-kaya ang presyo ng pagkain habang pinoprotektahan ang kapakanan ng mga lokal na magsasaka at mamimili sa gitna ng tumataas na halaga ng bilihin.