MARCH 25, 2025 — Magandang balita para sa mga nahalal na barangay at Sangguniang Kabataan (SK) officials: maaari na silang aktibong makampanya para sa kanilang mga kandidato nang walang takot na lumabag sa eleksyon. Ipinahayag ito ng Commission on Elections (Comelec) sa isang resolusyon, na naglilinaw na ang mga nahalal na opisyal ay libreng sumuporta sa pulitika.

Ang desisyong ito ay batay sa ruling ng Supreme Court na ang mga restriksyon sa pulitikal na aktibidad ay para lamang sa mga civil service employees — hindi sa mga elected officials.

“Nagkaroon ng decision sa Quintos vs Comelec … na sinasabi ng SC na ang barangay candidates pag nag-file ng candidacy ay hindi pwedeng gumamit ng CONA mula sa isang political party dahil ang BSKE ay apolitical. Pero once na nahalal na … sila ay politikal na at therefore, pwedeng sumuporta ng kandidato at pwedeng sumama sa kampanya,” paliwanag ni Comelec Chair George Erwin Garcia, na tumutukoy sa kasong Quintos vs. Comelec.

Subalit, mayroong kondisyon: kahit pwede silang mangampanya, bawal pa rin sa mga barangay at SK officials ang pilitin ang mga tauhan na mag-donate o gamitin ang pondo ng gobyerno — mga paglabag na may parusa pa rin sa ilalim ng batas.

Kasama rin sa exemption ang mga job order (JO) at contract of service (COS) workers, dahil hindi sila itinuturing na civil service employees. 

Ayon sa Comelec, walang batas na tahasang nagbabawal sa kanila sa pulitikal na pakikilahok. Pero binabalaan ng Comelec na ang exemption na ito ay “should be without prejudice to the liability of any person who would use under any guise whatsoever, directly or indirectly, public funds or money to employ JO and COS workers for the purpose of any election campaign or partisan political activity.”

(Hindi mag-aalis ng pananagutan sa sinumang gagamit, sa anumang paraan, direkta o hindi, ng pampublikong pondo o pera para gumamit ng JO at COS workers para sa layuning pang-eleksyon o partisan political activity.)

Para sa mga botante, ibig sabihin nito ay mas maraming pamilyar na mukha na ang makikita sa kampanya. Para sa mga lokal na opisyal, ito ay pagkakataon na buong-pusong suportahan ang kanilang kandidato — basta’t susundin lang palagi ang batas.

(Larawan: Foursquare)