Loria tutol sa P1-B ilaw sa Mayon, iginiit ang serbisyong panlipunan
Mayo 21, 2025 – Nangako si bagong halal na Albay Representative Carlos Loria na tututulan niya ang P1-bilyong artificial lighting project para sa Bulkang Mayon dahil sa pangamba sa epekto nito sa kalikasan at panawagan na ituon ang pondo sa mga serbisyong panlipunan.
Tinalo ni Loria si dating Ako Bicol Partylist lawmaker Christopher Co at iginiit na ang proyekto ay maaaring makasira sa natural na ganda ng bulkan at makagambala sa maselan nitong ekosistema.
“As the duly elected representative of the people in the second district of Albay, I will not allow the proposed artificial lighting of Mayon Volcano and the ongoing quarrying activities that threaten both the environment and the safety of the people,” ayon kay Loria.
Ang Mayon Volcano Heritage Aesthetic Lighting Project, na unang iminungkahi ng Tourism Infrastructure and Enterprise Zone Authority (TIEZA), ay nakatanggap ng matinding pagtutol mula sa mga lokal na opisyal at mga environmental advocate.
Naglabas rin ng pahayag ang Diocese of Legazpi laban sa plano: “Mayon does not need to be lighted. She needs to be left alone.”
Iginiit ni Loria na dapat ilaan ang P1-bilyong badyet sa mga serbisyong panlipunan tulad ng supply ng tubig, kalusugan, nutrisyon, at mga programang pangkabuhayan.
“Our priority is the people's welfare, social services that would transform the lives of the people to alleviate their lives from poverty, particularly in the far-flung barangay,” dagdag pa niya.
Bukod sa pagtutol sa lighting project, binigyang-diin din ni Loria ang kanyang paninindigan laban sa ilegal na quarrying sa Albay na tinawag niyang “alarming.”
Balak niyang makipagtulungan sa mga ahensya ng gobyerno at lokal na opisyal upang magpatupad ng mas mahigpit na parusa at mga alternatibong kabuhayan para sa mga apektadong komunidad.
Dahil sa matinding pagtutol ng publiko, opisyal nang binawi noong Marso 2025 ang proyektong pag-iilaw sa Bulkang Mayon.
Tiniyak ng pamahalaan na ang mga susunod na proyekto sa turismo ay nakatuon sa sustainable development at sa pangangalaga ng kalikasan at kultura ng bulkan.