MAYNILA, Pilipinas — Inanunsyo ni Executive Secretary Lucas Bersamin nitong Biyernes ang pinakabagong pagbabago sa gabinete, alinsunod sa direktiba ni Pangulong Ferdinand “Bongbong” Marcos Jr. na magsumite ng courtesy resignations ang mga opisyal.

Kumpirmado ni Bersamin na si Energy Secretary Raphael Lotilla ang itatalaga bilang bagong kalihim ng Department of Environment and Natural Resources (DENR), kapalit ni Ma. Antonia Yulo Loyzaga. Samantala, pansamantalang pamumunuan ni dating mambabatas Sharon Garin ang Department of Energy (DOE) bilang officer-in-charge.

Sa iba pang pagbabago, lilipat si Department of Human Settlements and Urban Development (DHSUD) Secretary Jose Acuzar sa bagong tungkulin bilang Presidential Adviser for Pasig River Development. Samantala, papalitan ni Foreign Affairs Undersecretary Tess Lazaro si Foreign Affairs Secretary Enrique Manalo, na itatalaga bilang Permanent Representative ng Pilipinas sa United Nations simula Hulyo 31, 2025.

Nilinaw ni Bersamin na nananatiling buo ang economic team ng administrasyon. Mananatili sa puwesto sina Trade Secretary Cristina Roque, Finance Secretary Ralph Recto, Economic Planning Secretary Arsenio Balisacan, Budget Secretary Amenah Pangandaman, at Special Assistant to the President for Investment and Economic Affairs Frederick Go.

Tungkol naman sa pag-alis ni Loyzaga, sinabi ni Bersamin na walang kinasasangkutang isyu ng katiwalian ngunit may mga puna ukol sa kanyang madalas na pagbiyahe sa ibang bansa.

“Maybe there is just a perception—I don’t know how fair or unfair that perception is—that she’s more frequently out of the country. That’s the recurring thing that’s being brought to our attention,” paliwanag niya.

Bahagi ang cabinet reshuffle ng mas malawak na layunin ni Marcos na “recalibrate” ang direksyon ng kanyang administrasyon matapos ang midterm elections, upang masiguro na umaayon ang mga opisyal sa bagong prayoridad ng pamahalaan.