Mayo 30, 2025 — Makakatanggap ng ₱80,000 livelihood assistance si Rose, ang babaeng naging viral matapos lumabas mula sa kanal sa Makati City, upang makapagsimula ng sariling sari-sari store, inanunsyo ni Department of Social Welfare and Development (DSWD) Secretary Rex Gatchalian nitong Huwebes.

Sa isang pagpupulong sa Pag-abot Center sa Pasay City, tiniyak ni Gatchalian na handang tumulong ang pamahalaan upang maibangon si Rose mula sa kanyang sitwasyon, at sinabi niyang, “Ang magiging intervention natin kay Rose, pangarap daw niya kasing magkaroon ng tindahan at sa assessment ng ating social worker ay kaya naman niya.”

Ibinunyag din ni Gatchalian na hinahanapan na rin nila ng tulong si Jerome, ang partner ni Rose, na may karanasan sa welding at ipinaliwanag niya na, “Si Jerome, ang kanyang partner, ay dadalhin din niya sa atin baka matulungan sa training dahil marunong mag-welding. So, baka matulungan sa pagbili ng welding machine para yung kita nilang dalawa mas maging stable.”

Bago nito, nanirahan sa mga lansangan ng Pasong Tamo, Makati City sina Rose at Jerome nang mahigit isang taon bago nakahanap ng marerentahang tirahan. Ang kanilang kaso ay bahagi ng Pag-abot Program, na nagbibigay ng pansamantalang masisilungan at kabuhayan sa mga pamilya at indibidwal na naninirahan sa kalye (FISS).

Binanggit ni Gatchalian na direktiba mismo ng Pangulo ang pagtulong sa mga FISS, at idinagdag niyang, “Ang DSWD ay naatasan ng ating Pangulo para siguraduhin na ang ating mga mamamayan na nakatira sa lansangan ay nakukupkop natin dito sa ating shelter, eto nga ang Pag-abot Center.”

Simula pa noong 2023, nagsisilbi ang Pag-abot Center bilang pansamantalang tirahan bago ma-reintegrate ang mga benepisyaryo sa kanilang mga probinsya na may suporta mula sa gobyerno.

Pangako ni Rose na tutulungan niya ang programa at sasama siya sa outreach teams ng Pag-abot upang hikayatin ang iba pang street dwellers na humingi ng tulong, at inilahad ni Gatchalian na, “Tutulong si Rose. Yung mga nakakasalamuha niya na kagaya niya ng sitwasyon, tutulungan niya kami na kumbinsihin sila na sumama dito sa Pag-Abot shelter para mabigyan ng tulong.”

Patuloy namang imo-monitor ng DSWD ang progreso ni Rose upang masigurong makapagsimula siya ng negosyo at tuluyan nang makabangon.

Image from Department of Social Welfare and Development - DSWD