Hunyo 18, 2025 — Inaresto sa Makati City ang dalawang Vietnamese national dahil sa umano’y ilegal na pagsasagawa ng cosmetic surgery, kinumpirma ng Criminal Investigation and Detection Group (CIDG) ngayong Miyerkules.

Kinilala ni CIDG-National Capital Region chief Col. Marlon Quimno ang mga suspek bilang sina Nguyen, 25-anyos na babae, at Phuong, 37-anyos na lalaki.

Naaresto sila sa isang entrapment operation sa Bel-Air, Makati City noong Hunyo 16, matapos ang reklamo ng isang kliyente na sumailalim sa nose lift at Korean fillers ngunit hindi umano nasiyahan sa naging resulta.

Ayon sa mga awtoridad, nahuling aktwal na nagsasagawa ng medical consultation ang mga suspek at nagbibigay pa ng presyo para sa mga cosmetic procedure gaya ng nose augmentation at body modification, kahit wala silang lisensya, permit, o rehistro mula sa Professional Regulation Commission (PRC).

"They are not doctors, have no permits, and are not qualified to perform procedures—yet they do, and they have many clients," ayon kay Quimno.

Kasalukuyang nasa kustodiya ng pulisya sa Camp Crame ang mga suspek at mahaharap sa kasong paglabag sa Medical Act of 1959.

Nanawagan ang mga awtoridad sa publiko na maging maingat sa pagpili ng mga cosmetic practitioner at tiyaking sila ay lisensyado at lehitimong propesyonal.