MANILA, Philippines — Patuloy sa paggalaw pa-kanluran hilagang-kanluran si Tropical Depression Crising habang nananatili ang lakas nito sa silangang bahagi ng Bicol Region. Itinaas ng Philippine Atmospheric, Geophysical and Astronomical Services Administration (PAGASA) ang Tropical Cyclone Wind Signal (TCWS) No. 1 sa siyam na lugar sa Hilagang Luzon.

Ayon sa ulat ng PAGASA ngayong 5 a.m., namataan si Crising sa layong 535 kilometro silangan ng Juban, Sorsogon, taglay ang pinakamalakas na hangin na 55 kilometro kada oras at pagbugso ng hanggang 70 kph. Kumikilos ito sa bilis na 15 kph.

Sakop ng Signal No. 1 ang mga sumusunod na lugar:

• Cagayan, kabilang ang Babuyan Islands

• Isabela

• Hilagang-silangang bahagi ng Aurora (Dilasag, Casiguran, Dinalungan, Dipaculao)

• Quirino

• Kalinga

• Silangang bahagi ng Mountain Province (Sadanga, Barlig, Paracelis, Natonin)

• Silangang bahagi ng Ifugao (Alfonso Lista, Aguinaldo, Mayoyao, Banaue, Hingyon, Lagawe, Lamut)

• Hilagang-silangang bahagi ng Nueva Vizcaya (Kasibu, Quezon, Bagabag, Diadi)

• Apayao

Nagbabala ang PAGASA ng posibleng minimal hanggang minor na epekto mula sa malalakas na hangin sa mga nabanggit na lugar, gayundin ng posibleng flash floods at landslides dahil sa katamtaman hanggang malalakas na pag-ulan.

Pinapalakas din ni Crising ang southwest monsoon (habagat), na nagdadala ng kalat-kalat na pag-ulan at thunderstorms sa Metro Manila, CALABARZON, MIMAROPA, Visayas, at ilang bahagi ng Mindanao.

Inaasahan ng PAGASA na lalakas pa si Crising at magiging tropical storm ngayong araw, at posibleng umabot sa severe tropical storm category pagsapit ng Biyernes ng hapon o gabi bago mag-landfall sa mainland Cagayan sa pagitan ng Biyernes ng gabi at madaling araw ng Sabado.

Inaasahan ding lalabas si Crising sa Philippine Area of Responsibility (PAR) pagsapit ng Sabado ng gabi o Linggo ng umaga matapos daanan ang hilagang bahagi ng Hilagang Luzon.

Pinapayuhan ang mga mangingisda at residente sa baybaying-dagat na maging maingat dahil sa inaasahang malalakas na alon at katamtamang panganib ng storm surge na aabot mula 1.0 hanggang 2.0 metro sa mabababang lugar ng Cagayan at Isabela.