AGOSTO 1, 2025 — Nanawagan ang mga grupo ng magsasaka kay Pangulong Ferdinand Marcos Jr. na dagdagan agad ang taripa sa imported na bigas para matigil ang paglobo ng kanilang lugi, na umabot na sa P54 bilyon. Ayon sa Federation of Free Farmers (FFF), bumagsak ang presyo ng palay ng P6 kada kilo nitong unang anim na buwan ng taon, na nagdulot ng malawakang pagkalugi sa sektor.

“We are urging the President to raise the rice tariff now, otherwise if we will wait the next review period in November, it will be too late for our palay farmers,” pahayag ni dating Kalihim ng Agrikultura Leonardo Montemayor, na dumalo sa kamakailang pagpupulong para sa taripa.

(Naninindigan kami na dapat itaas na ng Pangulo ang taripa sa bigas ngayon din, dahil kung hihintayin pa ang susunod na pagsusuri sa Nobyembre, huli na para sa ating mga magsasaka ng palay.) 

Idinidiin ng FFF na dulot ito ng labis na supply ng bigas sa bansa, kasabay ng malawakang importasyon. Dagdag pa nila, naapektuhan din ang presyo ng palay dahil sa bentahan ng subsidized na bigas ng pamahalaan sa P20 kada kilo, na nagpababa sa purchasing power ng mga traders.

Itinanggi naman ng Department of Agriculture (DA) ang epekto ng murang bigas sa presyo ng palay, at nagsabing maliit lang ang bahagi nito sa merkado. Subalit, iginiit ni Montemayor na kailangan ng malakas na political will ni Marcos para maipasa ang tariff hike, lalo’t kailangan pa itong aprubahan ng Kongreso.

Ayon sa DA, kailangang itaas ang taripa sa lalong madaling panahon para protektahan ang kita ng mga magsasaka bago mag-ani sa Setyembre. Bagama’t bumaba ang presyo ng bigas sa pandaigdigang merkado, kailangan umano ng agarang hakbang para hindi lalong mahatak pababa ang lokal na presyo ng palay.

Inaasahang isusumite na ng Department of Economy, Planning, and Development (DEPDev) ang rekomendasyon kay Marcos para sa kagyat na desisyon.

(Larawan: Philippine News Agency)