LAL-LO, CAGAYAN — Isang estudyanteng babae ang kasalukuyang nasa comatose state matapos mahulog mula sa sinasakyang Ferris wheel sa isang perya sa Lal-Lo, Cagayan noong Agosto 4. Ayon sa ulat ng GMA News, dumungaw ang biktima mula sa kinauupuang gondola habang ito ay nakahinto sa pinakataas na bahagi ng ride upang magsakay ng ibang pasahero.

Sa imbestigasyon ng pulisya, lumalabas na nahilo ang babae habang siya ay nakadungaw, dahilan upang mawalan ng balanse at mahulog mula sa taas na tinatayang 10 talampakan. Bagaman may arm bar ang mga gondola, wala umano itong seat belt na maaaring nakapigil sana sa pagbagsak ng biktima.

Agad siyang isinugod sa pinakamalapit na ospital kung saan siya ay nagtamo ng matinding sugat sa ulo at katawan. “Comatose ngayon ang isang babae matapos siyang mahulog mula sa sinasakyan niyang Ferris wheel sa Lal-Lo, Cagayan,” ayon sa ulat ng GMA Integrated News.

Dahil sa insidente, ipinatigil ng lokal na pamahalaan ang operasyon ng Ferris wheel habang isinasagawa ang masusing imbestigasyon. Sinusubukan ding makontak ng mga awtoridad ang operator ng ride upang kunin ang kanilang panig hinggil sa nangyari.

Nagpaalala ang mga awtoridad sa mga may-ari ng peryahan na tiyaking ligtas ang kanilang mga rides, lalo na ang pagkakaroon ng mga sapat na safety equipment gaya ng seat belts upang maiwasan ang ganitong trahedya.