AGOSTO 15, 2025 — Nagsanib-pwersa ang militar ng Pilipinas at Australia para sa Exercise ALON 2025, ang pinakamalaking overseas drill ng Australia ngayong taon. Ginanap ang seremonya ng pagbubukas sa Western Command headquarters sa Puerto Princesa, Palawan noong Biyernes, Agosto 15.

Ayon sa Armed Forces of the Philippines (AFP), sasailalim sa pagsasanay ang mga tropa sa Palawan at Luzon mula Agosto 15 hanggang 29. Kasama rin sa aktibidad ang 3,600 personnel mula sa AFP, Australian Defence Force (ADF), United States Marine Corps, at Royal Canadian Navy.

Layon ng ALON 2025 ang pagpapalakas ng interoperability, joint force projection, at multi-domain operations ng mga kasundaluhan. 

"It also reinforces the AFP's commitment to regional security cooperation, defense readiness, and capacity-building," dagdag ng AFP. 

(Pinatitibay din nito ang pangako ng AFP sa pakikipagtulungan sa seguridad ng rehiyon, kahandaan sa depensa, at pagpapaunlad ng kakayahan.)

Unang isinagawa ang ehersisyo noong 2023 bilang bahagi ng Indo-Pacific Endeavor.

Kabilang sa mga pangunahing aktibidad ang amphibious operations, maritime drills, at Combined Joint Forcible Entry Operation (CJFEO) sa Palawan, habang isasagawa naman ang live-fire exercises sa Fort Magsaysay, Nueva Ecija. Magmamasid rin ang mga obserber mula sa US, Canada, Japan, South Korea, New Zealand, at Indonesia.

Giit ni Australian Vice Admiral Justin Jones, Chief of Joint Operations, nagpapakita ang ALON 2025 ng matibay na seguridad partnership ng dalawang bansa. 

“We’re proud to conduct our largest overseas exercise with the Philippines, and continue to build on our close cooperation,” pahayag niya. “Exercise Alon 25 is an opportunity for us to practise how we collaborate and respond to shared security challenges, and project force over great distances in the Indo-Pacific.”

(Ipinagmamalaki namin ang pagdaraos ng aming pinakamalaking overseas exercise kasama ang Pilipinas, at ang patuloy na pagpapalalim ng aming malapit na kooperasyon. Ang Exercise Alon 25 ay pagkakataon para sa amin upang sanayin kung paano kami magtutulungan at tutugon sa mga shared security challenges, at magpapakita ng lakas sa malalayong lugar sa Indo-Pacific.)

Dagdag ni Jones, "This exercise reflects Australia’s commitment to working with partners to ensure we maintain a region where state sovereignty is protected, international law is followed, and nations can make decisions free from coercion."

(Ang ehersisyong ito ay nagpapakita ng dedikasyon ng Australia na makipagtulungan sa mga kasosyo upang masiguro ang isang rehiyon kung saan pinoprotektahan ang soberanya ng mga estado, sinusunod ang batas pandaigdig, at malayang nakakapag-desisyon ang mga bansa nang walang pamimilit.)

(Larawan: Armed Forces of the Philippines | Facebook)