Agosto 22, 2025 — Inaasahang tuluyan nang makalalabas ng Philippine Area of Responsibility (PAR) bukas, Sabado, ang Bagyong Isang, ayon sa Philippine Atmospheric, Geophysical and Astronomical Services Administration (PAGASA).

Sa pinakahuling ulat ng ahensya, patuloy na kumikilos ang bagyo pa-kanluran hilagang-kanluran at tatahak palabas ng PAR sa loob ng 24 oras. Wala itong direktang epekto sa malaking bahagi ng bansa, ngunit nagdudulot pa rin ng malalakas na alon sa silangan at hilagang bahagi ng Luzon.

Dahil dito, binalaan ang mga mangingisda at maliliit na sasakyang-dagat na huwag munang pumalaot dahil mapanganib ang lagay ng dagat.

Samantala, bukas din inaasahang papasok sa PAR ang isang bagong Low Pressure Area (LPA). Bagama’t hindi pa malinaw kung ito ay lalakas at magiging ganap na bagyo, mahigpit na binabantayan ng PAGASA ang naturang sama ng panahon.

Pinayuhan ng ahensya ang publiko na manatiling nakatutok sa mga susunod na weather bulletin para sa posibleng pagbabago ng lagay ng panahon, lalo na’t may mga lugar sa Luzon at Visayas na posibleng makaranas ng pag-ulan dahil sa habagat na hinahatak ng bagyo.