MANILA — Mariing tinutulan ni Presidential Adviser for Poverty Alleviation Larry Gadon ang panawagan ni Cavite 4th District Rep. Elpidio “Kiko” Barzaga Jr. na imbestigahan si House Speaker Martin Romualdez kaugnay ng kontrobersyal na flood control funds.

Sa kanyang pahayag, diretsahang kinuwestiyon ni Gadon ang basehan ng imbestigasyon at sinabing tila wala naman itong malinaw na pinanghahawakang ebidensya. Aniya: “Imbestigahan for what?”

Giit ni Gadon, malinaw umanong pampulitikang gimik lamang ang hakbang ni Barzaga at maaaring naglalayong sirain ang reputasyon ng Speaker. Ayon pa sa kanya, imbes na pag-aksayahan ng oras at pondo ang mga umano’y walang saysay na imbestigasyon, mas makabubuti raw na ituon ang atensyon sa mga programang nakakapagpababa ng kahirapan at nakakatulong sa pang-araw-araw na kabuhayan ng mga Pilipino.

Dagdag pa ni Gadon, hindi makakatulong sa pagbangon ng ekonomiya ang patuloy na bangayan sa politika. Sa halip, dapat aniya ay magkaisa ang mga mambabatas upang masigurong maayos na naipatutupad ang mga proyektong pang-imprastruktura at serbisyong panlipunan.

Samantala, nanindigan naman si Barzaga na mahalagang masilip ng Senado at Kamara ang lahat ng isyung may kinalaman sa paggamit ng pondo, lalo na kung ito ay may kinalaman sa flood control projects na libu-libong pamilya ang apektado. Gayunpaman, iginiit ni Gadon na hindi dapat idaan sa isyu ng intriga at pulitika ang usaping ito.

Ang bangayan sa pagitan ng mga opisyal ay inaasahang lalong magpapainit sa mga susunod na araw, lalo na’t patuloy ang isyu sa pondong nakalaan para sa mga proyekto ng gobyerno. (Larawan: Larry Gadon, Kiko Barzaga / Fb)