MANILA — Ipinataw ng Senate Blue Ribbon Committee ngayong Miyerkules, Setyembre 18, ang contempt order laban kay Curlee Discaya matapos mapatunayan na nagsinungaling siya tungkol sa dahilan ng hindi pagdalo ng kanyang asawa na si Sarah Discaya sa pagdinig hinggil sa umano’y iregularidad sa mga flood control project.

Sa pagdinig, iginiit ni Curlee na hindi nakadalo si Sarah dahil sa kanyang medical condition, kabilang ang stress-related palpitations at mababang insulin level. Ngunit lumabas sa opisyal na excuse letter na isinumite ni Sarah na ibang dahilan ang nakasaad: nakatakda umano siyang makipagpulong sa kanilang mga empleyado para talakayin ang kalagayan ng kanilang kumpanya.

Dahil sa magkasalungat na pahayag, nagpasya ang mga senador na ipa-contempt si Curlee, binigyang-diin na isang mabigat na paglabag ang panlilinlang sa Senado.

Binalaan din ng mga senador na posibleng maharap si Sarah Discaya sa parehong parusa kung patuloy niyang iiwasan ang mga pagdinig.

Patuloy na iniimbestigahan ng Blue Ribbon Committee ang umano’y ghost projects at iregular na bidding na kinasasangkutan ng mga kompanyang pag-aari ng mag-asawang Discaya, na nakakuha ng multi-bilyong pisong kontrata mula sa Department of Public Works and Highways (DPWH).