MANILA — Patuloy ang pagbilis ng galaw ng Bagyong Opong habang ito’y papalapit sa Romblon, ayon sa pinakahuling ulat ng PAGASA ngayong Biyernes ng umaga. Sa kabila ng bahagyang paghina mula sa kategoryang typhoon, nananatili itong isang severe tropical storm na may lakas na posibleng magdulot ng pinsala sa mga apektadong lugar.

Ayon sa 8:00 a.m. advisory ng PAGASA, huling namataan ang sentro ni Opong sa coastal waters ng Mandaon, Masbate, taglay ang maximum sustained winds na 110 km/h at gustiness na hanggang 150 km/h. Patuloy itong kumikilos pa-kanluran sa bilis na 30 km/h, patungong Sibuyan Sea at inaasahang lalabas sa West Philippine Sea sa gabi ng Setyembre 27.

Mga Lugar sa ilalim ng Signal No. 3

• Luzon: Sorsogon, Masbate (kasama ang Ticao at Burias Islands), Albay, Camarines Sur (kanluran at timog bahagi), Quezon (timog bahagi), Marinduque, Romblon, Oriental Mindoro, Occidental Mindoro (kasama ang Lubang Islands), Batangas, Laguna (timog bahagi)

• Visayas: Northern Samar (kanlurang bahagi), Samar (kanlurang bahagi), Biliran (pinakahilagang bahagi), Capiz (hilagang-kanlurang bahagi), Aklan (hilagang bahagi), Caluya Islands

• Storm-force winds (89–117 km/h) ang inaasahan sa mga lugar sa ilalim ng Signal No. 3 sa loob ng 18 oras, na maaaring magdulot ng pinsala sa mga bubong, pananim, at imprastruktura.

• Malalakas na pag-ulan ang inaasahan sa Bicol Region, Eastern Visayas, at Southern Luzon, na maaaring magdulot ng flash floods at landslides.

• Storm surge na may taas na higit sa 3 metro ang posible sa mga baybayin ng Metro Manila, CALABARZON, MIMAROPA, Bicol, Samar, at Leyte.

• Sea travel ay lubhang mapanganib sa mga lugar na may gale warning, lalo na sa silangang baybayin ng Visayas at Bicol, kung saan ang alon ay maaaring umabot sa 14 metro.

Ayon sa PAGASA, “Opong may re-intensify once it emerges over the West Philippine Sea. Mandatory evacuations may be necessary in high-risk coastal areas.”

Pinayuhan ang mga residente sa mga apektadong lugar na manatiling alerto, makinig sa mga anunsyo ng lokal na pamahalaan, at iwasan ang paglalakbay sa mga lugar na may babala ng sama ng panahon.