NOBYEMBRE 10, 2025 — Nakalabas na sa kalupaan ng Luzon ang mata ng bagyong Uwan (Fung-wong) nitong madaling araw ng Lunes, ngunit nananatili pa rin ang babala ng malalakas na hangin at ulan sa malaking bahagi ng bansa.

Ayon sa ulat ng Philippine Atmospheric, Geophysical and Astronomical Services Administration (Pagasa), nasa baybayin na ng Bacnotan, La Union ang bagyo bandang alas-4 ng umaga. Bagamat humina ito, taglay pa rin ni Uwan ang lakas na 150 kilometro kada oras at bugso na umaabot sa 230 kph habang kumikilos pa-kanluran hilagang-kanluran sa bilis na 25 kph.

Nagbabala ang Pagasa na posibleng muling lumakas ang bagyo sa Martes o Miyerkules habang nasa West Philippine Sea, pero may posibilidad ding humina ito dahil sa hindi kanais-nais na kondisyon sa paligid.

Samantala, iniulat ng Office of Civil Defense na may isang nasawi at dalawang nasugatan sa pananalasa ng bagyo sa Luzon. Maraming bubong ang natuklap at mga puno ang nabuwal habang tumatawid si Uwan sa kalupaan.

Narito ang pinakahuling tala ng mga lugar na nasa ilalim ng Tropical Cyclone Wind Signals (TCWS):

TCWS No. 4 – inaasahan ang mapaminsalang hangin sa loob ng 12 oras

• Kanlurang bahagi ng Nueva Vizcaya: Bayombong, Ambaguio, Bagabag, Villaverde, Kayapa, Santa Fe, Aritao, Bambang, Solano
• Timog-kanlurang bahagi ng Kalinga: Tinglayan, Pasil, Lubuagan
• Kanlurang bahagi ng Mountain Province: Besao, Tadian, Sagada, Bauko, Sadanga, Bontoc, Sabangan, Barlig
• Timog bahagi ng Abra: Tubo, Luba, Boliney, Villaviciosa, Pilar, Daguioman, Bucloc, Manabo, San Isidro, San Quintin, Pidigan
• Kanlurang bahagi ng Ifugao: Lagawe, Mayoyao, Hungduan, Asipulo, Banaue, Hingyon, Kiangan, Lamut, Tinoc
• Buong Benguet
• Gitna at timog ng Ilocos Sur: Narvacan, Nagbukel, Santa Maria, Burgos, San Esteban, Santiago, Banayoyo, Lidlidda, San Emilio, Quirino, Cervantes, Gregorio del Pilar, Sigay, Suyo, Alilem, Salcedo, Galimuyod, Candon, Santa Lucia, Santa Cruz, Tagudin, Sugpon
• Buong La Union
• Buong Pangasinan
• Hilagang bahagi ng Nueva Ecija: Carranglan, Lupao, Talugtug, Cuyapo, Nampicuan
• Hilagang bahagi ng Tarlac: Ramos, Paniqui, Anao, San Manuel, Moncada, Camiling, San Clemente
• Hilagang bahagi ng Zambales: Santa Cruz, Candelaria

TCWS No. 3 – inaasahan ang mapaminsalang hangin sa loob ng 18 oras

• Timog-kanlurang bahagi ng Cagayan: Rizal, Solana, Tuao, Piat, Enrile
• Kanlurang bahagi ng Isabela: Santo Tomas, Alicia, San Mateo, Aurora, Santa Maria, Quezon, Ramon, Naguilian, Roxas, San Guillermo, Luna, Delfin Albano, Cauayan, Echague, Angadanan, Benito Soliven, Santiago, Reina Mercedes, San Agustin, San Manuel, Cabatuan, Quirino, Gamu, San Isidro, Mallig, Cordon, Jones, Burgos
• Timog bahagi ng Apayao: Kabugao, Conner
• Natitirang bahagi ng Kalinga, Ifugao, Abra, Mountain Province
• Buong Quirino
• Timog bahagi ng Ilocos Norte: Nueva Era, Solsona, Dingras, Marcos, Banna, Batac, Paoay, Currimao, Pinili, Badoc
• Natitirang bahagi ng Ilocos Sur, Nueva Vizcaya, Nueva Ecija, Aurora, Bulacan, Pampanga, Tarlac, Zambales, hilagang bahagi ng Bataan

TCWS No. 2 – inaasahan ang malalakas na hangin sa loob ng 24 oras

• Natitirang bahagi ng Cagayan kabilang ang Babuyan Islands
• Natitirang bahagi ng Isabela, Apayao, Ilocos Norte, Aurora, Bulacan, Bataan
• Buong Quezon kabilang ang Polillo Islands
• Metro Manila, Rizal, Laguna, Cavite, Batangas, Marinduque
• Hilagang bahagi ng Oriental Mindoro: Pola, Naujan, Calapan, Victoria, Baco, Puerto Galera, San Teodoro, Socorro, Pinamalayan, Gloria
• Hilaga at gitnang bahagi ng Occidental Mindoro kabilang ang Lubang Islands: Abra de Ilog, Paluan, Mamburao, Santa Cruz, Sablayan
• Buong Camarines Norte
• Hilagang-kanlurang bahagi ng Camarines Sur: Del Gallego, Ragay, Lupi, Sipocot

TCWS No. 1 – inaasahan ang malalakas na hangin sa loob ng 36 oras

• Buong Batanes
• Hilagang bahagi ng Palawan kabilang ang Calamian, Cuyo, at Cagayancillo Islands: Taytay, Dumaran, El Nido, Araceli, Roxas, San Vicente
• Natitirang bahagi ng Camarines Sur
• Buong Catanduanes, Albay, Sorsogon, Masbate kabilang ang Ticao at Burias Islands
• Buong Romblon
• Natitirang bahagi ng Oriental at Occidental Mindoro
• Kanluran at gitnang bahagi ng Northern Samar: Lope de Vega, Rosario, Biri, San Isidro, Capul, San Vicente, Victoria, Lavezares, San Antonio, Mondragon, San Jose, Pambujan, Catarman, San Roque, Allen, Bobon, Silvino Lobos, Laoang
• Hilagang-kanlurang bahagi ng Samar: Calbayog City, Tagapul-An, Almagro, Santo Niño
• Buong Iloilo, Capiz, Aklan, Antique kabilang ang Caluya Islands

Ayon sa Pagasa, “Uwan is expected to weaken gradually due to increasingly unfavorable conditions.” 

(Inaasahang unti-unting hihina si Uwan dahil sa papalalang kondisyon sa paligid.)

Patuloy ang pag-monitor ng mga awtoridad sa galaw ng bagyo. Pinayuhan ang publiko na manatiling alerto at sumunod sa mga abiso ng lokal na pamahalaan.

(Larawan: DOST-PAGASA | Facebook)