NOBYEMBRE 21, 2025 — Sa loob ng anim na buwan matapos ang pagkakaaresto, isang Malaysian national ang nahatulan ng habambuhay na pagkakakulong dahil sa pagkakasangkot sa pinakamalaking drug bust na naitala sa Zambales ngayong taon.

Si Kong Ket Koon ay idineklarang guilty beyond reasonable doubt ng Olongapo City Regional Trial Court (RTC) sa kasong illegal possession ng methamphetamine hydrochloride o shabu, alinsunod sa Section 11, Article II ng Republic Act No. 9165, kilala bilang Comprehensive Dangerous Drugs Act of 2002. Bukod sa habambuhay na sentensiya, ipinataw din sa kanya ang multang ₱10 milyon.

Ang desisyon ay ipinromulga noong Nobyembre 19, ayon sa Department of Justice (DOJ). 

Sa kanilang pahayag, binigyang-diin ng ahensya ang bilis ng proseso: “Barely half a year from the time the accused was apprehended, the team of prosecutors were able to secure the conviction of accused Koon.” 

(Halos kalahating taon mula nang maaresto ang akusado, nagawa ng mga piskal na makamit ang hatol laban kay Koon.)

Pinuri ng DOJ ang panel ng mga piskal na pinangunahan ni Assistant State Prosecutor Mary Grace V. Pulido-Sadian, kasama sina Prosecution Attorneys Klarissa U. Arcillas at Ryan E. Leocario, sa mabilis na pag-usad ng kaso.

Matatandaang si Koon ay nadakip noong Hunyo 19 sa isang maritime interdiction operation na isinagawa ng Northern Luzon Naval Command (NLNC) sa pakikipagtulungan ng Philippine Drug Enforcement Agency (PDEA). Nahuli siyang sakay ng isang Philippine-registered fishing vessel na may apat pang kasama.

Sa loob ng naturang barko, natagpuan ang 50 sako ng shabu na tinatayang may kabuuang timbang na 1.48 tonelada. Ayon sa PDEA, ang halaga ng nakumpiskang droga ay umabot sa ₱10.2 bilyon.

Ang pagkakahuli at mabilis na hatol laban kay Koon ay itinuturing na malaking tagumpay ng mga awtoridad sa patuloy na kampanya kontra droga, na muling nagbigay-diin sa lawak ng operasyon ng mga sindikato sa karagatan ng bansa.

(Larawan: Philippine News Agency)