NOBYEMBRE 23, 2025 — Muling pumukaw ng pansin ang marangyang kasal ng anak ni CWS Party-list Rep. Edwin Gardiola sa Tuscany, Italy nitong Mayo 2024. Ang engrandeng selebrasyon, na dinaluhan ng 170 panauhin at ilang personalidad mula sa Pilipinas, ay nagbigay-diin sa magastos na pamumuhay ng kongresista na tinaguriang “top DPWH contractor” ng isang kapwa mambabatas.

Si Batangas Rep. Leandro Leviste ang nagsiwalat na si Gardiola umano ay nakapag-“pre-order” ng humigit-kumulang ₱20 bilyon na proyekto bago pa man maaprubahan ang pambansang budget para sa 2025. Ayon sa ulat, siya ang ikalawang pinakamalaking sponsor ng mga infrastructure project, kasunod lamang ng nagbitiw na si Ako Bicol Rep. Zaldy Co.

Habang mainit ang usapin sa flood control scandal ng administrasyong Marcos, kumalat online ang mga larawan mula sa kasal ng anak ni Gardiola, si Kaila, kay Michael Tiaoqui. Tampok sa mga litrato ang mga kilalang panauhin gaya nina dating House Speaker Martin Romualdez at Tingog Rep. Yedda Romualdez na naging principal sponsors, pati na si Co na dating pinuno ng appropriations committee.

Hindi lang mga bisita ang inilipad mula Pilipinas — pati mga supplier ay isinama. 

Idinaos ang seremonya sa makasaysayang Church of Ognissanti sa Florence bago lumipat ang mga panauhin sa Villa Corsini a Mezzomonte, isang dating Medici estate na ngayon ay eksklusibong venue para sa mga ultra-yaman. 

Ayon sa mga online rate, umaabot sa ₱1.67 milyon hanggang ₱2 milyon ang renta para sa 50 bisita sa peak season. Dahil 170 ang dumalo, mas malaki ang tinatayang gastos ng pamilya Gardiola.

Isinulat ng Italian wedding coordinator ang detalyadong setup: “Two long parallel tables filled the main hall, dressed in white and pink open roses, hydrangeas, endless glass candelabras, and stick candles. Above them, clouds of gypsophila and hydrangeas filled the high ceilings. The evening flowed with speeches, songs, the finest Florentine cuisine, and surprise fireworks during the cake cutting.” 

(Dalawang mahahabang mesa ang pumuno sa hall, binalutan ng puti at pink na rosas, hydrangeas, walang katapusang candelabras at kandila. Sa itaas, ulap ng gypsophila at hydrangeas ang nagtakip sa kisame. Umagos ang gabi sa mga talumpati, awitin, pinakamainam na pagkaing Florentine, at sorpresa ng fireworks sa cake cutting.)

Ang bride ay nakasuot ng gown mula kay Michael Leyva, samantalang Valentino ang sapatos. Ang groom ay naka-custom suit ni Bianca Cordero at Prada shoes. 

Dumating ang mag-asawa sa isang cream-colored vintage Morgan 4/4, at sinalubong ng cocktails sa hardin ng villa. Nagpatuloy ang kasiyahan hanggang madaling-araw, na pinatindi ng bar na puno ng mamahaling alak gaya ng Macallan 18 Year Old Sherry Oak na nagkakahalaga ng hanggang ₱45,000 kada bote, at Tequila Don Julio Blanco.

Sa gitna ng mga tanong sa pinagmulan ng yaman, ang kasal sa Tuscany ay nagsilbing matingkad na larawan ng marangyang pamumuhay ng pamilya Gardiola — isang eksenang lalong nagpasiklab ng interes sa publiko.

(Larawan: Reddit)