NOBYEMBRE 23, 2025 — Sa gitna ng pagpapatupad ng bagong ordinansa sa Maynila na nagbabawal sa pagsusuot ng balaclava, face mask, helmet, pati na rin ng mga sumbrero at hoodie sa loob ng mga tanggapan ng gobyerno at komersyal na establisimyento, umalma ang grupong kabataan na Samahan ng Progresibong Kabataan (SPARK). Ayon sa kanila, ang naturang panukala ay naglalagay sa panganib ng karaniwang mamamayan at maaaring magbunga ng pang-aabuso ng kapangyarihan.

Binibigyang-diin ng ordinansa na obligadong alisin ng mga motorista at pasahero ang kanilang helmet kapag bumababa, gayundin ang sinumang papasok sa mga gusali na nakatakip ang mukha. Ang sinumang lalabag ay maaaring pagmultahin ng ₱1,000 sa unang beses, hanggang ₱5,000 sa paulit-ulit na paglabag, at maaari pang makulong ng hanggang 15 araw o mawalan ng lisensya sa pagmamaneho.

Ipinaliwanag ni Mayor Francisco “Isko” Moreno Domagoso na layunin ng ordinansa na pigilan ang krimen sa pamamagitan ng mas madaling pagkilala sa mga suspek. 

Sa isang Facebook Reel, sinabi niya: "Magwi-withdraw ka lang sa ATM, tinatakpan mo pa yung mukha mo? Why? Kung wala ka namang tinatago, eh guwapo ka naman, maganda ka naman?" 

Ngunit para sa SPARK, ang malabong probisyon ng ordinansa ay nagbubukas ng pinto sa profiling, harassment, at arbitraryong paghinto ng mga tao sa lansangan. 

Sa kanilang pahayag, binigyang-diin nila: "The Anti-Balaclava Ordinance is a shortcut that bypasses human rights, civil liberties, and constitutional freedoms. Manila’s leaders should rethink this ordinance before it becomes another tool of abuse." 

(Ang Anti-Balaclava Ordinance ay isang shortcut na nagba-bypass sa karapatang pantao, kalayaan sibil, at mga konstitusyonal na karapatan. Dapat muling pag-isipan ng mga lider ng Maynila ang ordinansa bago ito maging kasangkapan ng pang-aabuso.)

(Larawan: Philippine News Agency)