NOBYEMBRE 23, 2025 — Nahuli ng National Bureau of Investigation (NBI) sa Quezon City nitong Sabado ang isang hindi pinangalanang engineer ng Department of Public Works and Highways (DPWH) na kabilang sa mga akusado sa umano’y iregular na flood control projects. Kinumpirma ng ahensya na may bisa ang warrant of arrest laban sa kanya, kasama ang iba pang opisyal na pinangalanan ng Sandiganbayan.

Nauna na siyang tinangkang arestuhin sa Cavite, ngunit hindi siya natunton doon. 

Habang matagumpay na naaresto ang naturang engineer, bigo namang maabutan ng Quezon City Police District (QCPD) ang iba pang akusado sa unang pagsubok na ihatid ang mga warrant sa kanilang mga tirahan. 

Ayon sa pahayag ng QCPD: “While operatives visited all registered addresses of the accused, none of the subjects were present during the attempts; hence, no warrant was deemed served.” 

(Habang binisita ng mga operatiba ang lahat ng rehistradong tirahan ng mga akusado, wala ni isa ang naroon; kaya’t walang naiprosesong warrant.)

Isa sa mga tinutugis ay si Anthony Ngo, miyembro ng board ng Sunwest Corp., na nakalista sa mga warrant. Sa operasyon ng QCPD at Criminal Investigation and Detection Group (CIDG) sa Rolling Hills, New Manila, caretaker lamang ang humarap sa mga pulis at nagsabing matagal nang hindi nakatira si Ngo doon. Dagdag pa ng pamilya, wala na silang komunikasyon sa kanya mula nang lumabas ang warrant.

Kinabukasan, sinuyod ng Kamuning Police Station ang mga tirahan na konektado kina Lerma Cayco, accountant ng DPWH MIMAROPA, at Timojen Sacar, materials engineer ng parehong rehiyon. Ayon sa mga kaanak ni Cayco, naka-leave siya, habang sinabi naman ng mga guwardiya ni Sacar na matagal na niyang nilisan ang dating tirahan.

Samantala, iniulat ng Talipapa Police na si Dominic Serrano, hepe ng Construction Division ng DPWH MIMAROPA, ay huling nakita dalawang linggo bago lumabas ang warrant.

Patuloy ang malawakang manhunt ng QCPD, katuwang ang iba pang national agencies. Nakikipag-ugnayan na rin ito sa Philippine Center on Transnational Crime para sa posibleng Red Notice, habang hinihintay ang aksyon ng Department of Justice sa pag-isyu ng Hold Departure Order. 

Bukod dito, inirekomenda na rin sa Department of the Interior and Local Government ang paglalagay ng pabuya upang mapabilis ang paghuli sa mga natitirang akusado.

(Larawan: Reddit)