NOBYEMBRE 24, 2025 — Iginiit ng Department of Justice (DOJ) na walang batayan si dating presidential spokesperson Harry Roque na gamitin ang prinsipyo ng non-refoulement upang pigilan ang kanyang pagbabalik sa bansa, sa kabila ng kanyang asylum petition sa The Hague, Netherlands.

Ayon kay DOJ spokesperson Polo Martinez, hindi saklaw ni Roque ang naturang prinsipyo dahil hindi siya biktima ng political persecution. 

“There are no grounds for him to say that because of the principle of non-refoulement … hindi po siya pwe-pwedeng kunin, ano?” aniya.

Ang non-refoulement, ayon sa Office of the United Nations High Commissioner for Human Rights, ay nagbabawal sa mga estado na ibalik ang isang indibidwal kung may matibay na dahilan na siya’y posibleng makaranas ng matinding panganib gaya ng torture, pang-aabuso, o seryosong paglabag sa karapatang pantao.

Binanggit ni Martinez na ang sitwasyon ni Roque ay malinaw na may kaugnayan sa mga kasong kriminal, hindi sa pang-uusig pulitikal. 

“It begs the question, may political persecution po ba na nangyayari? No, because in fact, you are being charged here for crimes that you allegedly committed. it is incumbent upon you to answer these charges.”

Dagdag pa niya, kung babalik si Roque sa Pilipinas, may pagkakataon itong ipagtanggol ang sarili sa korte. 

“In fact, antithetical sinasabi niya na persecuted siya because if he does come back here, he’d be able to face the charges head on and have the opportunity to present his defenses,” katwiran niya.

Si Roque ay nahaharap sa kasong qualified human trafficking kaugnay ng Lucky South 99 POGO firm sa Angeles, Pampanga RTC. Dahil dito, humiling ang pamahalaan sa Interpol na maglabas ng red notice laban sa kanya. Kanselado na rin ng Pasig court ang kanyang pasaporte, pati na ang kay Cassandra Li Ong, kinatawan ng Lucky South 99.

Sa kabila ng red notice, iginiit ni Roque sa social media na protektado siya ng refugee at asylum law habang nakabinbin ang kanyang petisyon. 

“Because the Dutch authorities know I am an asylum seeker, the Dutch police cannot lawfully apprehend or return me to the Philippines while my asylum petition is pending,” aniya.

Samantala, nanawagan ang DOJ sa lahat ng may kasong nakabinbin na harapin ang proseso ng batas. 

“We enjoin them, the DOJ as well as the Philippine government, implores for them to voluntarily surrender themselves to the jurisdiction of the Sandiganbayan and whatever court has pending cases,” giit ng ahensya. 

(Hinahamon namin sila, ang DOJ at pamahalaan, na kusang sumuko sa hurisdiksiyon ng Sandiganbayan at iba pang korte na may nakabinbing kaso.)

(Larawan: Reddit)