MANILA, Pilipinas — Nag-anunsyo ang Department of Justice (DOJ) na magbibigay ito ng ₱1 milyon pabuya sa sinumang makapagtuturo at makapagbibigay ng “credible” at “actionable” na impormasyon hinggil sa kinaroroonan ni Cassandra Li Ong, na kasalukuyang nahaharap sa kasong kriminal sa Regional Trial Court ng Pasig City.

Ayon kay Acting Justice Secretary Fredderick Vida, layunin ng pabuya na mapabilis ang paghahanap at pag-aresto kay Ong. 

“Ang [DOJ] formally announcing... ₱1 milyon reward for credible, actionable information that will directly lead to the lawful discovery, location and subsequent arrest by authorized law enforcement agent of Cassandra Li Ong, who is presently the subject of ongoing criminal proceedings before the Regional Trial Court of Pasig City,” pahayag ni Vida nitong Martes.

Batay sa DOJ, si Ong ay nahaharap sa qualified human trafficking charges kaugnay ng operasyon ng Lucky South 99 offshore gaming hub sa Porac, Pampanga. Siya ay dati nang nakulong sa Correctional Institution for Women (CIW) ngunit nakalaya at ngayo’y itinuturing na “at large.”

Kinumpirma rin ng DOJ na kinansela na ang pasaporte ni Ong upang hindi siya makalabas ng bansa. Ayon kay Senador Sherwin Gatchalian, si Ong ay may mahalagang papel sa operasyon ng Lucky South 99 na sangkot sa trafficking ng mga dayuhan.

Dagdag pa ni Vida, ang pabuya ay magsisilbing insentibo para sa publiko na makipagtulungan sa mga awtoridad. Tiniyak ng DOJ na ang lahat ng impormasyon ay ituturing na kumpidensyal at ang mga makikipagtulungan ay bibigyan ng proteksyon.

Sa kasalukuyan, nakikipag-ugnayan na ang DOJ sa iba’t ibang law enforcement agencies upang mas paigtingin ang operasyon laban kay Ong. Ang hakbang na ito ay bahagi ng mas malawak na kampanya ng pamahalaan upang tiyakin na ang mga akusado sa kasong kriminal ay haharap sa hustisya.