LTO, BIR, FDA nanguna sa ‘most complained’ agencies sa ARTA report
Margret Dianne Fermin • Ipinost noong 2025-11-25 08:20:01
MANILA, Pilipinas — Ibinunyag ni Senador Sherwin “Win” Gatchalian ang sampung ahensya ng gobyerno na nakatanggap ng pinakamaraming reklamo mula sa publiko, batay sa ulat ng Anti-Red Tape Authority (ARTA).
Ayon kay Gatchalian, chairman ng Senate Finance Committee, ang listahan ay bahagi ng masusing monitoring ng ARTA sa pagpapatupad ng Republic Act 11032 o ang Ease of Doing Business and Efficient Government Service Delivery Act of 2018. Layunin nitong tukuyin ang mga ahensiyang madalas ireklamo ng mamamayan dahil sa mabagal, magulo, o hindi maayos na serbisyo.
Top 10 “Most Complained” Agencies
- Land Transportation Office (LTO) – pangunahing reklamo ang mabagal na proseso sa pagkuha ng lisensya at rehistro ng sasakyan.
- Bureau of Internal Revenue (BIR) – isyu sa komplikadong tax filing at mabagal na serbisyo.
- Food and Drug Administration (FDA) – reklamo sa mabagal na pag-apruba ng permits at clearances.
- Philippine Statistics Authority (PSA) – madalas ireklamo ang delay sa pag-isyu ng birth certificates at iba pang civil registry documents.
- Land Registration Authority (LRA) – problema sa mabagal na proseso ng land titles at dokumento.
- Social Security System (SSS) – isyu sa benepisyo at claims processing.
- Home Development Mutual Fund (Pag-IBIG Fund) – reklamo sa loan processing at membership services.
- Department of Foreign Affairs (DFA) – madalas ireklamo ang passport application at appointment system.
- Department of Health (DOH) – isyu sa regulatory permits at health-related clearances.
- Department of Education (DepEd) – reklamo sa mabagal na pagproseso ng dokumento at iba pang administrative concerns.
Binanggit ni Gatchalian na ang naturang ulat ay magsisilbing gabay sa Kongreso upang mas paigtingin ang oversight at tiyakin na ang mga ahensya ay sumusunod sa batas. “Ang mga ahensiyang ito ay dapat magsilbing ehemplo ng mahusay na serbisyo publiko. Kapag sila mismo ang madalas ireklamo, malaking dagok ito sa tiwala ng taumbayan,” aniya.
Dagdag pa ng senador, plano ng Senado na ipatawag ang mga pinuno ng naturang ahensya upang ipaliwanag ang mga reklamo at maglatag ng konkretong hakbang para mapabilis ang serbisyo.