MANILA, Pilipinas — Na-intercept ng Bureau of Customs (BoC) ang walong container ng mga buhay na millipedes sa isang bodega sa Pasay City, ayon sa ulat ng ahensya nitong Lunes. Ang kargamento, na nakatakdang ipadala sa United Kingdom, ay idineklara bilang “assorted consumer goods” ngunit natuklasang naglalaman ng mga wildlife specimens.

Ayon sa BoC–Ninoy Aquino International Airport (NAIA), ang shipment ay naharang noong Nobyembre 19 matapos lumabas ang “irregularities” sa x-ray screening. Nang buksan ang mga container, tumambad ang mga buhay na millipedes na nakapaloob sa mga pakete ng juice powder mix, face masks, instant noodles, delicacies, photo frames, at iba pang consumer items.

Agad na isinailalim sa kustodiya ng Department of Environment and Natural Resources (DENR) ang mga nakumpiskang hayop para sa tamang pangangalaga at disposisyon. Kilala ang millipedes bilang “nature’s recyclers” dahil sa kanilang mahalagang papel sa ekosistema, partikular sa pagkain ng nabubulok na organikong materyales.

Sinabi ni BoC Commissioner Ariel Nepomuceno na ang operasyon ay patunay ng mas pinaigting na kakayahan ng ahensya sa pagtukoy ng mga misdeclared shipment, lalo na kung wildlife species ang sangkot. “This operation highlights the Bureau’s strengthened capability in detecting attempts to misdeclare goods, particularly shipments involving wildlife species,” ani Nepomuceno.

Dagdag pa ng BoC, ang pagtatangkang ipuslit ang mga millipedes ay malinaw na paglabag sa Republic Act 10863 o Customs Modernization and Tariff Act. Bukod dito, posibleng lumabag din ito sa mga batas na nagbabawal sa ilegal na pangangalakal ng wildlife.

Sa ngayon, patuloy ang imbestigasyon upang matukoy ang mga responsable sa shipment. Tiniyak ng BoC na mas paiigtingin pa ang kanilang pagbabantay sa mga kargamento upang maiwasan ang pagpuslit ng mga hayop at iba pang ipinagbabawal na produkto palabas ng bansa.

Larawan mula Bureau of Customs PH