MANILA, Pilipinas — Tatlong akusado sa kontrobersyal na flood control projects na iniimbestigahan ng pamahalaan ay nakikipag-ugnayan na sa mga embahada ng Pilipinas sa ibang bansa para sa kanilang boluntaryong pagsuko, ayon sa National Bureau of Investigation (NBI) nitong Martes.

Kinumpirma ni NBI Deputy Director Lito Magno na mayroong surrender feelers mula sa tatlong indibidwal na sangkot sa anomalya. “Meron na pong surrender feelers ‘yun pong mga nasa ibang bansa,” pahayag ni Magno sa panayam sa Super Radyo dzBB. 

Dagdag pa niya, ang impormasyon ay mula kay Interior Secretary Jonvic Remulla, na nagsabing ang mga akusado ay nakikipag-coordinate na sa mga Philippine embassies. “Katunayan, nabanggit po niya sa isang pahayag niya na ang tatlo ay nagpunta na po, nakipag-coordinate na po sa ating Philippine embassies,” ani Magno.

Ayon sa NBI, may opsyon ang mga akusado na kusang bumalik sa Pilipinas at sunduin sa mga paliparan, o kaya ay magpadala ng law enforcement agents upang sila ay pabalikin. Sa kasalukuyan, walo na ang naaresto kaugnay ng flood control mess at dinala sa Sandiganbayan para sa booking at commitment orders, habang ilan pang akusado, kabilang ang dating Ako Bicol party-list Rep. Zaldy Co, ay nananatiling at large.

Ang flood control mess ay tumutukoy sa umano’y multi-billion peso anomalous projects sa Oriental Mindoro at iba pang lugar, kung saan ilang opisyal ng Department of Public Works and Highways (DPWH) at contractors ang kinasuhan ng graft at malversation of public funds.

Nagbabala rin ang NBI sa publiko na huwag magtago ng mga suspek dahil maaari itong magresulta sa pananagutan sa batas. Tiniyak ng ahensya na patuloy ang koordinasyon sa Department of Foreign Affairs (DFA) at mga embahada upang matiyak ang ligtas at legal na proseso ng pagsuko.