MANILA, Pilipinas — Nanawagan si Senate Majority Leader Juan Miguel Zubiri sa Anti-Red Tape Authority (ARTA) na buhayin muli ang tinaguriang “public shame campaign” laban sa mga ahensya ng gobyerno at LGUs na madalas ireklamo dahil sa red tape.

Sa deliberasyon ng Senado para sa panukalang 2026 budget ng ARTA, sinabi ni Zubiri na mahalagang ipaalam sa publiko kung aling mga tanggapan ang may pinakamaraming reklamo upang mapilitang magpatupad ng reporma. 

“We need to revive the shame campaign. Let the people know which agencies and LGUs are the worst offenders when it comes to red tape. Transparency is the best deterrent,” ani Zubiri.

Batay sa ulat ng ARTA, kabilang sa mga “most complained” agencies ang Food and Drug Administration (FDA), Land Transportation Office (LTO), Bureau of Internal Revenue (BIR), Philippine Statistics Authority (PSA), at Land Registration Authority (LRA). 

Sa hanay naman ng mga government-owned and controlled corporations (GOCCs), madalas ireklamo ang Social Security System (SSS), Pag-IBIG Fund, Securities and Exchange Commission (SEC), PhilHealth, at Government Service Insurance System (GSIS).

Ayon kay Zubiri, ang pagbabalik ng shame campaign ay makakatulong upang mapabilis ang serbisyo at mabawasan ang katiwalian. “Kung alam ng publiko kung sino ang palpak, mapipilitan silang ayusin ang kanilang sistema. This is about accountability,” dagdag pa niya.

Samantala, suportado rin ni Senador Sherwin Gatchalian ang panukala, at iginiit na ang transparency ay mahalagang hakbang upang mapabuti ang serbisyo publiko.

Ang ARTA ay itinatag sa ilalim ng Republic Act 11032 o Ease of Doing Business and Efficient Government Service Delivery Act of 2018, na layong bawasan ang red tape at gawing mas mabilis ang mga transaksyon sa gobyerno.

Larawan mula Juan Miguel Zubiri Facebook