DISYEMBRE 1, 2025 — Sinuspinde ng Kamara si Cavite 4th District Rep. Kiko Barzaga ng 60 araw matapos siyang ideklarang guilty sa “disorderly behavior” kaugnay ng kanyang mga kontrobersyal na social media posts. Sa botong 249 pabor, 5 tutol, at 11 abstain, inaprubahan ng plenaryo ang rekomendasyon ng House Committee on Ethics na tanggalan siya ng sahod at allowance sa loob ng dalawang buwan.

Ayon kay 4Ps party-list Rep. JC Abalos, chair ng komite, malinaw na lumabag si Barzaga sa Rules of the House of Representatives at sa Code of Conduct and Ethical Standards for Public Officials and Employees (RA 6713).

“His actions reflected negatively upon the dignity, integrity, and reputation of the House of Representatives as an institution of the members of the House individually and collectively,” ani Abalos. 

(Ang kanyang mga ginawa ay nagdulot ng negatibong epekto sa dignidad, integridad, at reputasyon ng Kamara bilang institusyon at ng mga miyembro nito.)

Kasama sa parusa ang direktiba na burahin ni Barzaga ang 24 na posts na naging paksa ng reklamo sa loob ng 24 oras mula nang pagtibayin ang ulat ng komite. Ang mga naturang posts ay inakusahang nakakasakit, mapanira, at may tendensiyang mag-udyok ng kawalan ng tiwala sa pamahalaan. Isa pa, binanggit sa reklamo na nagbiro si Barzaga tungkol sa pagsunog ng Batasang Pambansa, bagay na itinuring na “inciting to sedition.”

Sa plenaryo, tinanggap ni Barzaga ang desisyon ngunit nanindigan sa kanyang posisyon laban kay Pangulong Ferdinand Marcos Jr.

“I wholeheartedly accept the decision of the committee, but I maintain my stance that President Marcos must be held accountable for his crimes. Too many people have died, and too much money was plundered from the Filipino people for us to stand down now,” wika ni Barzaga. 

(Lubos kong tinatanggap ang desisyon ng komite, ngunit naninindigan ako na dapat managot si Pangulong Marcos sa kanyang mga krimen. Sobra na ang mga namatay at sobrang yaman ang nawaldas mula sa sambayanang Pilipino para tayo’y manahimik.)

Dagdag pa niya, ang anumang kaparusahan na ipapataw sa kanya ay maliit kumpara sa mga buhay at kinabukasan na maililigtas kapag bumaba sa puwesto ang Pangulo.

Itinuring ng Kamara ang suspensiyon bilang isa sa pinakamabigat na parusa na maaaring ipataw sa isang miyembro, kasunod lamang ng expulsion. Sa loob ng 60 araw, hindi makakadalo si Barzaga sa mga sesyon, wala siyang opisina sa Kamara, at hindi rin makakatanggap ng anumang benepisyo.

Si Abalos, sa kanyang ulat, ay binigyang-diin na hindi maaaring gamiting depensa ang “karapatan sa malayang pananalita” sa mga kasong may kinalaman sa maling asal ng isang kongresista.

“If every member would invoke their right to free speech in every instance where an improper conduct is being investigated, there would be no instance when a member can ever be held accountable or liable,” ani Abalos. 

(Kung bawat miyembro ay gagamit ng karapatan sa malayang pananalita sa tuwing iniimbestigahan ang maling asal, walang pagkakataon na maaring managot ang sinuman.)

Bukod sa suspensiyon, nahaharap din si Barzaga sa kasong kriminal na isinampa ng Criminal Investigation and Detection Group (CIDG) dahil sa umano’y pag-uudyok ng sedisyon at rebelyon. Tinanggal na rin siya sa Army Reserve Force kung saan siya ay nag-enlist bilang private noong Enero.

Hindi ito ang unang pagkakataon na nagpatupad ng mabigat na parusa ang Kamara sa sarili nitong miyembro. Noong 2023, pinatalsik si Negros Oriental Rep. Arnie Teves dahil sa kasong pagpatay kay Gov. Roel Degamo. Noong 2024, sinensor si dating Speaker Pantaleon Alvarez dahil sa mga pahayag na umano’y mapanira at nag-uudyok ng sedisyon.

(Larawan: Philippine News Agency)