PAGBILAO, QUEZON — Isang lalaki mula Quezon City ang natagpuang wala nang buhay sa loob ng Quezon National Forest Park, partikular sa kilalang “Bitukang Manok” road network, matapos umano’y umalis ng kanilang tahanan dahil sa hindi pagkakaunawaan nila ng kanyang asawa.

Batay sa paunang imbestigasyon ng Pagbilao Police, umalis ang biktima sa kanilang bahay matapos ang isang alitan at nakapagpadala pa ng mensahe sa kanyang asawa bago bumiyahe patungong Quezon. Sa naturang mensahe, sinabi raw ng lalaki na doon na siya huling makikita. Nakakuha rin ang mga awtoridad ng isang sulat na iniwan niya, na tumulong sa agarang pagkilala sa kanya.

Kinabukasan, nadiskubre ang kanyang bangkay ng ilang residente na dumadaan sa lugar at agad itong ini-report sa mga awtoridad. Agad rumesponde ang pulisya at forest rangers ng Quezon National Forest Park upang i-secure ang lugar at kunin ang katawan ng biktima.

Patuloy pang inaalam ng pulisya ang mga posibleng dahilan ng pagkamatay ng lalaki. Isinasailalim din sa masusing pagsusuri ang sulat at mensaheng iniwan nito upang mabuo ang kabuuang pangyayari bago ang insidente. Inaalam din kung may foul play na sangkot o kung personal na desisyon ng biktima ang pagpunta sa naturang lugar.

Samantala, nanawagan ang mga awtoridad sa publiko na agad makipag-ugnayan sa mga kinauukulan kung may napapansing kahina-hinalang aktibidad sa loob ng Quezon National Forest Park, lalo na’t madalas itong daanan ng mga motorista at turista. (Larawan: Quezon Province News / Facebook)