MANILA — Dumating sa National Bureau of Investigation (NBI) nitong Martes ang kontraktor na si Cezarah Rowena “Sarah” Discaya upang sumuko, kasabay ng inaasahang paglalabas ng warrant of arrest laban sa kanya ngayong linggo kaugnay ng kontrobersyal na “ghost” flood control projects sa Davao Occidental.

Nagtungo si Discaya sa NBI headquarters sa Quezon City bandang alas-10 ng umaga kasama ang kanyang legal counsel. Ang kanyang pagharap sa NBI ay naganap ilang oras matapos ipahayag ni Pangulong Ferdinand Marcos Jr. na inaasahan nang ilalabas ng korte ang warrant laban sa kanya. 

“Inaasahan na din nating lalabas ang warrant of arrest ni Sarah Discaya itong linggong ito, at hindi na rin magtatagal ang pag-aresto sa kanya,” ani Marcos sa isang video message.

Si Discaya at ang kanyang asawa na si Pacifico “Curlee” Discaya II ay nasangkot sa mga anomalya matapos masangkot ang kanilang mga kumpanya, kabilang ang Alpha and Omega General Contractor & Development Corporation at St. Timothy Construction, sa halos ₱96.5 milyong flood control project na idineklarang kumpleto at bayad noong 2022 ngunit natuklasang hindi umiiral nang inspeksyunin ng Criminal Investigation and Detection Group (CIDG) nitong Setyembre.

Noong Disyembre 5, nagsampa ng Office of the Ombudsman ng mga kasong kriminal laban kay Discaya at ilang opisyal ng Department of Public Works and Highways (DPWH) kaugnay ng naturang proyekto. Kabilang sa mga kasong isinampa ay graft at malversation of public funds.

Samantala, kinumpirma ni Pangulong Marcos na may walong tauhan ng DPWH ang nagpahayag ng intensyong sumuko sa NBI habang hinihintay ang paglalabas ng kani-kanilang arrest warrants. “We will continue to pursue accountability to protect public funds and ensure justice is served,” dagdag ng Pangulo.

Sa kasalukuyan, nakikipag-ugnayan ang NBI sa hudikatura upang iproseso ang warrant at ang kaukulang legal na hakbang laban kay Discaya. Wala pang inilabas na pahayag ang kampo ni Discaya hinggil sa kanyang pagsuko.