DISYEMBRE 10, 2025 — Umigting lalo ang kontrobersiya sa Monterrazas de Cebu matapos kumpirmahin ng Department of Environment and Natural Resources (DENR) na nagsampa na ito ng kasong kriminal laban sa developer ng naturang high-end na proyekto sa kabundukan ng lungsod.

Ayon kay DENR Assistant Secretary for Legal Affairs and Enforcement Atty. Norlito Eneran, isinampa ang reklamo noong Disyembre 3, 2025. 

“For the Monterrazas case, we already filed a criminal case on December 3, 2025, for violation of Section 77 of Presidential Decree No. 705 or the Revised Forestry Code against the corporation,” aniya sa isang press conference. 

(Para sa kaso ng Monterrazas, nagsampa na kami ng kasong kriminal noong Disyembre 3, 2025, dahil sa paglabag sa Section 77 ng Presidential Decree No. 705 o Revised Forestry Code laban sa korporasyon.)

Ang naturang probisyon ay tumutukoy sa ilegal na pagmamay-ari ng mga kagamitan na ginagamit ng mga forest officer. Kapag napatunayang nagkasala, maaaring makulong ng dalawa hanggang apat na taon, pagmultahin ng ₱1,000 hanggang ₱10,000, kumpiskahin ang mga gamit, at awtomatikong kanselahin ang permit.

Bago pa man ang pagsasampa ng kaso, nakapagtala na ang DENR ng serye ng paglabag kaugnay ng konstruksyon ng Monterrazas at retention pond nito. Isa sa pinakamabigat na isyu ay ang pagputol ng mahigit 700 puno noong 2022, kung saan 11 na lamang ang natira kahit may tree-cutting permit. 

Bukod dito, binanggit ng ahensya ang paglabag sa Presidential Decree 1586 o Environmental Impact Statement System, at ang hindi pagkuha ng discharge permit na nakasaad sa Clean Water Act of 2004.

Dagdag pa ng DENR, kulang pa rin ang mga pasilidad ng proyekto para sa paghawak ng tubig-ulan. Ang retention pond at 15 karagdagang estruktura ay hindi umano sapat upang maiwasan ang pagbaha. 

Nabatid din na sampu sa 33 Environmental Compliance Certificates (ECCs) ang nilabag ng Monterrazas.

Mariin namang itinanggi ng Mont Property Group, developer ng proyekto, ang paratang ng malawakang pagputol ng puno. 

“The claim that Monterrazas de Cebu cut down more than 700 trees is grievously false, and we are confident that any evidence that may be presented to assert this narrative can easily be disproven,” pahayag ng kumpanya. 

(Ang paratang na nagputol ang Monterrazas de Cebu ng mahigit 700 puno ay lubhang mali, at kami’y tiyak na anumang ebidensiyang ihaharap upang patunayan ito ay madaling mapapabulaanan.)

Giit pa ng developer, alinsunod sa kanilang ECC at development permit, mga damo at undergrowth lamang ang inalis para sa earthworks. Sa kanilang Environmental Impact Statement na isinumite sa EMB-DENR Region VII, nakasaad na ang lugar ay dominado ng damo at palumpong, halos walang topsoil, at hindi kayang suportahan ang agrikultura.

Matatandaang lumakas ang batikos sa proyekto matapos ang pagbaha sa Cebu City kasabay ng pananalasa ng Bagyong Tino. Itinuro ng ilang residente ang Monterrazas bilang dahilan ng pagbaha, bagay na itinanggi ng Mont Property Group. 

“We are likewise aware of the misinformation circulating online that incorrectly attributes the widespread flooding across Cebu to our development … Monterrazas de Cebu is located in Barangay Guadalupe, which is several kilometers away from the heavily flood-stricken areas in Liloan, Mandaue, and Talisay,” paliwanag ng kumpanya. 

(Batid namin ang maling impormasyon na kumakalat online na ikinakabit ang malawakang pagbaha sa Cebu sa aming proyekto … Ang Monterrazas de Cebu ay nasa Barangay Guadalupe, na ilang kilometro ang layo sa mga lugar na matinding binaha sa Liloan, Mandaue, at Talisay.)

Sa kabila ng pagtanggi ng developer, nananatiling nakabinbin ang kaso at inaasahang magiging sentro ng masusing imbestigasyon at pampublikong diskurso sa mga darating na buwan.

(Larawan: Philippine News Agency)