OZAMIZ CITY — Matinding dalamhati at panawagan para sa hustisya ang iniwan ng pagkamatay ng isang 13-anyos na batang lalaki, na kinilala lamang sa alyas na “Jake,” matapos itong bawian ng buhay habang naka-confine sa Mayor Hilarion A. Ramiro Sr. Medical Center (MHRSMC) sa Ozamiz City. Inirereklamo ng pamilya ng biktima ang umano’y kapabayaan sa loob ng ospital, partikular ang sinasabing pagkaantala sa pag-refill ng oxygen na kritikal sa kondisyon ng bata.

Ayon sa ina ng biktima na si Mei Gen, malinaw umanong hirap nang huminga ang kanyang anak ngunit natagalan ang pag-refill o pagpapalit ng oxygen tank. “Ilang beses po akong humingi ng tulong dahil nakikita ko na pong nahihirapan ang anak ko, pero parang mabagal ang aksyon,” ani ng ina. Dagdag pa niya, sa halip na agarang tugon, nakaranas pa umano sila ng malamig at hindi maayos na pakikitungo mula sa ilang doktor at nars na naka-duty noong mga panahong kritikal ang kalagayan ng bata.

Bukod sa isyu ng oxygen, kinuwestiyon din ng pamilya ang sanhi ng pagkamatay na inilagay sa medical records. Ayon kay Mei Gen, pneumonia ang unang ipinaalam sa kanila na kondisyon ng kanyang anak, subalit kalaunan ay rabies umano ang nakasaad na cause of death. Dahil dito, humihiling ang pamilya ng malinaw, detalyado, at dokumentadong paliwanag mula sa pamunuan ng ospital.

Bilang tugon sa mga alegasyon, kinumpirma ng pamunuan ng MHRSMC na nagsagawa na sila ng internal na pagsusuri kaugnay sa insidente, kabilang ang pamamahala ng oxygen supply at ang kabuuang pag-aalaga sa pasyente. Sa kasalukuyan, wala pa ring opisyal na pahayag ang administrasyon ng ospital hinggil sa resulta ng imbestigasyon. Patuloy namang humihingi ng hustisya ang pamilya ni “Jake” at nananawagan ng pananagutan kung mapatutunayang may naganap na kapabayaan. Umaasa rin ang publiko na magsisilbing daan ang imbestigasyong ito upang mapabuti ang serbisyong pangkalusugan at maiwasan ang kahalintulad na trahedya sa hinaharap. (Larawan: Mei Gen / Facebook)